【頭條獨家】參加《造星II》博有轉機 劉瑞祈視比賽為學習機會
2019-12-13 01:15 
《全民造星II》已選出了最後10強，周日（15日）將有冠軍誕生。今次真人騷繼續有不少熟口熟面參賽者，97號的Kay（劉瑞祈），其實早在16年以二人男子組合ReVe身份出道，不過未見成績，加上隊友年幾前走埋，Kay決定參賽博一博，雖然20強止步，但他已覺超出預期，更認為是個非常好的學習機會，亦大大提升了知名度，他更睇好老死JJ（范卓言）可在比賽中奪冠。撰文：杜淑霞 攝影：李權威 場地：Alive Dance Studio
27歲的Kay當年跟陳子華（Cavan）組二人男子組合ReVe，到過台灣集訓，可惜發展平平，年多前隊友更決定離港發展，孤軍作戰的他在舊同事、上屆《造星》參賽者阿神（曾贊學）鼓勵下決定參賽，「隊友走咗年幾，真係唔知點打算，佢就話不如參加比賽可能係一個機會，佢自己都係參賽轉變好大。」
唔顧歌手形象
不過，Kay坦承最初只望入到50強，「嗰時真係諗住做到幾個表演，譬如唱到自己入行第一首歌，已經好滿足㗎啦！真係冇諗到咁遠，講真愈耐愈發覺真係唔想離開呢個舞台，之後真係有諗過希望入到10強，但𠵱家入到20強都冇失望，不過比賽後節目要我講感受，最初真係講唔到嘢。」
Kay謂比賽令他成長了很多，「以前做歌手，咩都有公司照顧，今次我公司講明唔會理我，比賽令我變得獨立咗好多，又唔會成日顧住歌手身份同形象，以前自己有做模特兒嗰啲兼顧都唔敢同人講，𠵱家反而唔會啦！」講到對未來期望，他好希望有機會達成歌手夢外，還想跟老友阿神齊齊做主持，「我諗同佢合作應該會好開心，當然都想拍劇，但自己對演戲冇乜信心。」
最新回應