【頭條獨家】聖誕前搜購過膝長靴 孫佳君紅唇紅頸巾襯絕行街

45歲的性感辣媽孫佳君雖已是兩子之母，但堅持輸人唔輸陣，唔會輸畀一班後生女，所以多年嚟不論身材同樣貎都Keep住進化，與此同時，當然都要人靠衣裝啦！眼見聖誕節及新年即將到來，孫佳君出動搜購派對場合戰衣。日前厚紅唇孫佳君現身中環IFC睇鞋，專攻明星最愛的秋冬大熱鞋款過膝長靴，用嚟配襯短裙短褲及黑絲，即可變身25歲小野貓，性感可愛，索爆全場！採訪：李權威

雖然唔係做女，但孫佳君依然對自己好有要求，自信心亦爆棚。月前她才風騷地自拍大頭泳照放上網，圖中可見可夾實枝筆的深坑事業線，相當浮誇！除咗有身材外，孫佳君亦都好重視一雙美腿，原來她有晒腿癮，時不時上載夾腳美腿相，大擺誘人pose。

得個試字
日前戴上「鬼面罩」及茶色太陽眼鏡嘅孫佳君去中環shopping，大時大節多Party，點可以少咗對著到變長腿嘅長靴呢！見佢一枝箭咁衝入高級鞋店試有踭長boots，長Boots唔易着，有少少脂肪都着唔落，見索媽唔太難Handle，可見小腿夠瘦。不過揀咗兩對，試來試去都唔多合心意，搞到孫佳君冇晒癮，好掃興。但離開前都唔蝕底，對住塊長身鏡撥吓頭髮，照吓鏡先，望真啲，原來佢白色衫襯埋白色指甲油；紅唇襯咗深紅頸巾，係經過悉心打扮嘅，唯一敗筆係被雙下巴出賣咗，真係歲月不饒人呢。