【頭條獨家】15億人民幣新作遭擱置 彭浩翔飲啡目露兇光

彭浩翔以前拍好多本土電影，人望高處，之後彭導就向內地發展。年初有消息指彭導將拍攝金庸的《鹿鼎記》，新聞咁樣寫，「以三部曲形式重回大銀幕，每部預算暫定8000萬美金，(約5億人民幣)」一部5億人民幣，三部就15億，嘩嘩嘩嘩嘩。不過最新消息就話呢，「《鹿鼎記》涉外族敏感內容，不獲發拍攝批文遭擱置。」咁彭導點算?唔知呀，剩係見佢同老婆飲啡唔識笑囉。採訪:梁志明

上網Check彭浩翔套《鹿鼎記》，資料唔多，只知計劃2019年中開拍，2021年上映，演員非常秘密，有傳周迅有份演出，同埋彭導籌備咗兩年，仲話個劇本係佢寫過最好嘅劇本。不過內地拍戲要攞批文，據知半年前開始申請拍攝批文，一直未批出，原因係電影內容涉及攻打外族比較敏感，劇本幾次修改都仲未過到關，投資方惟有將前期籌備工作全部叫停。

見到記者刻意笑
據知彭導唔想無了期咁等，所以已為英皇公司監製一部低成本電影《怕死聯盟》，亦已在成都拍攝中。日前下晝，彭導同老婆同一友人喺銅鑼灣利園飲咖啡，全程彭導負責發言，其餘人負責聽，彭導表現唔算太Sad，但笑容唔多，有時仲會目露凶光，之後見到記者就刻意大笑，仲要笑出聲，飲完就行過隔離商業大廈食飯。