王梓軒親赴越南探養女 餵雞打水感慨多

王梓軒獲香港救助兒童會委任為「助養兒童親善代表」，早前更赴越南老街探訪助養女兒小花(Hoa)及視察救助兒童會在該區的工作。

當日出發前，工作人員透露小花很害羞，梓軒說：「我哋一開始玩破咗冰先，同埋搵佢啲朋友一齊陪住佢會冇咁驚，我仲會去佢屋企探佢父母、又會去學校、社區探訪，好充實。」

梓軒的熱情成功打破與小花的隔膜，之後兩人一起去打井水、餵雞及掃地，梓軒表示：「小花好慢熱、天真無邪，幾歲就要喺屋企做家務，爸爸媽媽要湊孫，小花亦會幫手湊，小花嘅理想好偉大，一般少數民族越南話都唔會識，通常都係喺農田生活，尤其係女仔一般都唔會出城市工作，所以小花想做醫生，佢好努力學習一個新語言，希望將來可以去幫屋企人同朋友，呢班小朋友有得返學好開心，老師離開課室，佢哋會即刻攞番本書出嚟讀。我希望用生命影響生命，令世界更好。」