八卦李蕙敏點同老外老公傾心事 Sammi聽完嗌「冤氣」

鄭秀文（Sammi）的第2場紅館個唱昨晚舉行，請來同期出道，也曾傳過不和的李蕙敏（Amanda）擔任表現嘉賓。
穿上超短牛仔褲的Sammi先晒蜜桃Pat，又教大家扮海豚拍手掌自製PongPongStick，然後她一邊唱《默契》一邊介紹嘉賓Amanda出場。合唱後Sammi稱與Amanda大約30年前同期出道，Amanda笑言：「大家都係童星！」並大讚Sammi弗到爆，話口未完立即伸摸Sammi的腹肌「驗證」，還笑言惹來台下歌迷妒忌。
Sammi八卦問：「我成日都好好奇，你咪嫁咗個老外，有時傾心事點傾呢？我哋廣東話好地道架嘛，例如『今日真係㷫過火屎！』咁點翻譯？」Amanda就話會用「Fire」、「Super Angry」以表達極級嬲嬲豬，Sammi笑著亂講一通：「My heart burning fire shit！」Amanda自爆：「我有時嬲起上嚟真係叫佢『eat shit and die』，你知嗌交好講反應快，有時諗唔到就直講。（咁佢點呀？）佢咪笑囉！呢啲咁港式英文，佢都唔明。」Sammi說：「所以話愛情呢啲嘢，不用多語言，其實只係識Hi同Bye都結到婚，其他嘢用愛搭夠。」Amanda拖住Sammi手示範：「仲有動作嘅……『Goodnight，kiss kiss』咁就得㗎啦！」Sammi無眼睇：「真係好冤氣！」
然後Sammi請Amanda唱歌，台下觀眾大叫《活得比你好》，Amanda說：「嗱，唔好意頭嘢我唔做㗎，喺人哋演唱會……不過呢首歌，人生中無論遇到幾困難、幾低點，希望以呢首歌互相鼓舞……《活得比『佢』好》！」全場掌聲。