劉德華新戲「炸地鐵站」 古天樂感興奮

劉德華、古天樂兩大男神接受香港開電視專訪，古仔回憶拍《掃毒2天地對決》期間，同時兼顧幾部電影的拍攝工作。談及如何投入每個角色，古仔透露：「每部戲我都會搵一首歌出嚟，當你一聽首歌，果個人物自然會走出嚟！同埋當你做起嘢上嚟，個人唔係好識攰，以前我同華仔喺電視台都試過，連續番21、22個鐘，你番到屋企究竟沖涼定瞓覺任你揀！」

而作為主演兼監製的劉德華，則解構搭建中環港鐵站，與古仔作最後對決的原因：「我地最初揀咗好多地方，原本打算去到沙田橋底，落埋水坑咁樣，但始終覺得呢啲場景好多人見過，同埋唔似喺大家身邊發生，所以決定搭建中環站，於是就喺其他場景裡面剩番啲錢，用嚟做呢場戲！」

提及這場戲，古仔亦興奮表示：「因為真係一比一搭出嚟，同埋有時睇戲會諗點解外國咁好咩都可以炸，但香港就唔係好得！我成日覺得，嘩！地鐵站炸咗佢？好嘢喎！」

至於去年底因喉嚨發炎，被迫取消演唱會的華仔，亦預告明年會以最佳狀態重踏紅館舞台：「因為我9月就已經係星馬巡迴，所以由7、8月開始，我會慢慢投入果個節奏，直至出年2月香港演唱會補場！」