【雙雄首次合唱】古天樂自認業餘 劉德華：我都係業餘到依家

劉德華與古天樂首次為二人主演的電影《掃毒2天地對決》合唱主題曲《兄弟不懷疑》，雙雄首次合唱，為音樂市場注入新力量，古仔聞言笑言：「咁大件事？咁都好可歌可泣啦喎！唱歌我業餘嘅啫，唔好咁講。」華仔也笑說：「我都係業餘到依家，諗番起對上一首剛陽味重嘅歌，都好多年前同偉仔（梁朝偉）嘅《無間道》，所以依家市場上都需要番啲男性嘅音樂同歌曲。」
古仔問：「華哥有冇聽過我啲歌呀？」華仔即說：「有！我都聽過好多，但真真正正講個歌名出來真係幾難。在錄音過程中，知道古仔會擔心自己做得唔好，但佢睇小咗自己，事實佢做得好好！我幾鍾意佢唱『關係』個段，大家留意下!」古仔聽到要互相評分，他立即笑說：「咁我一定係0分，華哥就100分！」
電影講述雙雄之間的兄弟情，主題曲歌詞出自監製及主角之一的劉德華手筆，華仔表示寫了好幾日。問對古仔有否對歌詞給意見？他說：「佢哋有畀份歌詞我睇，我第一個反應係：唔好玩啦！我都唔識唱歌，點畀意見啫！」至於在錄音時分別腦內想像甚麼來投入感情？古仔謂：「諗起最後Ending 在地鐵內嘅畫面，十幾年嘅兄弟情，因為大家唔肯聽大家講嘢就冇咗。」