貝依霖被指「藍絲」 杜汶澤拍片解畫

反修例事件引發連串社會爭議，有部分藝人表示支持示威者，亦有不少藝人發聲支持警方執法。

而杜汶澤公司旗下的女藝人貝依霖（Chantale）日前在社交網站上因發表疑反對示威者等相關言論，因而被網民標籤為「藍絲」，更質問杜汶澤：「杜先生，你應該好明白你嗰台嘅觀眾係咩人，點解可以一路笑騎騎同咁嘅人合作？」更表示如若不開除貝依霖，將會罷看其網台。

其後，杜汶澤於今日在其網台上載一段約20分鐘名為「小杜消息」的短片向觀眾解釋事件。片中杜汶澤讀出一堆貝依霖於社交網站發表的言論，當中有罵示威者、亦有罵撐警人士、更有罵網民的言論，杜汶澤指：「佢未必係藍絲嚟，佢見到啲咩嘢覺得不滿就出聲。」

對於有網民指：「杜汶澤人格有問題，條女政治立場佢根本唔care，最緊要畀你班咸濕仔J，佢就有錢賺。」杜汶澤回應：「我好想講，係咪而家呢個社會就係你要迫佢去表態，佢唔表態就係有嫌疑，如果佢係藍絲我哋就唔用得佢？」

杜汶澤續指，Chantale是他們公司的「開國功臣」，「炒咗佢我咪不仁不義？」杜汶澤又說道：「我覺得，係咪真係要去了解下件事先呢？係咪真係要了解下Chantale，到底係點諗？如果佢係唔知嘅，我係咪應該畀多啲資訊佢知，等佢了解下，檢討下自己如果啲嘢跟得唔貼，係咪應該唔好咁易下判斷？」

最後杜汶澤強調：「我係開放討論嘅，我好想畀大家一個同我討論嘅空間，大家可以留言，我會每一個都睇，從而去睇返究竟我哋應該點樣去處理Chantale呢件事。」

對於杜汶澤出面回應，網民反應兩極，有人表示：「杜汶澤我支持嘅，不過貝依霖真係太離譜」，亦有人說：「杜汶澤都幾double standard」。