山水有相逢！ 黃韻詩重現江湖與李司棋飯聚　

仲認得經典電影《92黑玫瑰對黑玫瑰》的艷芬，及1980年電視劇《山水有相逢》中的梅劍仙嗎？無錯她就是已退出幕前多年的黃韻詩。李司棋係社交網突然晒出與好友聚會相，驚見艷芬（黃韻詩）重出江湖，「梅妹」同「梅劍仙」不再鬥氣反而同枱食飯。

提起「梅妹」同「梅劍仙」，李司棋與黃韻詩憑著精湛的演技，演活了這兩個角色，兩師姊妹為咗一個男子及名利，大梅姐細梅姐反目幾十年，一見面就鬥氣，加上精警對白，成為神劇！之後的《92黑玫瑰對黑玫瑰》黃韻詩飾演黑玫瑰的真正傳人艷芬，由馮寶寶演經常失憶的飄紅，生鬼的演技令觀眾留下深刻印象，成為經典好戲。

原來黃韻詩已移民加拿大多年，李司棋話曾多次邀約對方拍戲，不過她樂得逍遙只想同老公周圍去旅行，唔諗復出喎。在李司棋晒出來的飯聚相中，仲有由配音做到常客串幕前的謝月美，以及舊日麗的映聲（麗的電視前身）演員訓練班的拍檔張偉盈及鍾楚蓮。

網民紛留言：「見到黃韻詩，就諗起你地套《山水有相逢》啦，好睇好睇！！」、「大梅姐細梅姐，絕對經典」，「真係《山水有相逢》呀！」。