Cheronna舉行迷你音樂會 獲家人男友撐場勁感動

女子組合Super Girls成員Cheronna（吳嘉熙）日前推出新歌《無利可圖》，於尖沙咀舉行迷你音樂會，她表示今次更有份參與作曲，十分興奮：「《無利可圖》係我第一首有份參與作曲嘅歌，真係好開心，因為冇諗過自己可以去到呢一步，見到作曲一欄有自己個名，真係覺得好開心、好感動，所以係一個好特別嘅嘗試，希望之後有多啲機會參與寫作。」

提到父親聯同男友黃奕晨（Dixon）現身支持，Cheronna坦言相當開心，「我都有一段時間冇出歌，同埋好耐冇演出live show，之前《你的你》派台時有參加一啲live show表演，不過Daddy好多都miss咗。今次叫咗Daddy嚟睇，好可惜媽咪要做嘢嚟唔到，不過有一件好特別嘅事，就係Dixon之前話有工作，但最後都趕嚟支持我，所以成件事好有愛，表演嘅時候知道佢哋喺度，我個心會好定，冇咁緊張。」

另外， 剪了一頭新髮型的Cheronna透露近日積極瘦身，「之前真係太鍾意食嘢，所以肥咗好多呀，今次真係好堅決，同埋用好健康嘅方法去減肥，唔會係唔食嘢、餓到好辛苦嘅減法，我會Keep住做運動、練舞，加上媽咪煮健康餐，所以今次減肥旅程唔算辛苦。」