Super Girls約同門食開年飯 半粒鐘KO成盆盆菜

女子組合Super Girls與同公司的余香凝、廖子妤、麥子樂、黎學勤、陳詩欣、鄺潔楹、劉志偉及余潔瀅相約於大年初二，一起嘆盆菜食「開年飯」，相當熱鬧。眾人未開餐已嘈到拆天，而且相當「擦得」，不消半小時已K.O.整盆盆菜。

去年Super Girls推出快歌紀念相識7周年，其中隊長趙慧珊（Aka）和吳嘉熙（Cheronna）更先後「單飛」推出歌曲作品，5位成員表示豬年將各在不同範疇發展。Aka表示，「Yanny（陳穎欣）會去拍電影，我同Cheronna繼續專注音樂，Jessica（蔡明思）多方面嘗試同打理自己眼鏡品牌，而Heidi（李靜儀）除咗拍戲，亦會同唔同時裝品牌合作。」她們亦強調組合並非「解散」，並指共同目標是「豬年發過豬頭」。當日，Yanny和Cheronna突然起哄叫Aka派利是。難道Aka好事近? Yanny指，「因為佢首新歌派台成績唔錯，所以佢話會派大利是畀我們，一齊分享呢份喜悅。」

至於剛被拍到有新戀情的陳詩欣直言，已有一段時間冇拍拖，現與對方了解中，暫時未有結婚打算。而鄺潔楹今年亦與節目《學是學非》主持一起在年宵擺攤檔賣豬仔帽、地毯及糖等豬仔產品，她指眾人共投資了6位數，並感謝無綫幕後工作人員的支援。