祖馬龍心水│「佳運發」過關頭纜

Coldplay嚟香港，黃牛黨當大家傻仔，一張飛炒貴九倍，呢鋪就算中咗六寶，祖馬龍都要撳住荷包。仲記得當年SARS之後百業蕭條，全城搞活動振興經濟，計有Westlife、Air Supply、滾石樂隊等相繼喺維港巨星匯演出。祖馬龍當時仲細，雞腸都唔識多隻，但呢啲樂隊出名到無可能唔識，雖然唔係特別鍾意聽佢哋啲歌，但名氣呢家嘢確實吸引到祖馬龍，好想去感受吓氣氛，不過門票難買、黃牛又搶錢，所以只能望門輕嘆。

今期沙田賽日，祖馬龍都係追逐名氣馬，「鑽石星空」連場無W有P，計血統增程係合理部署；九月尾「氣勢」季內初出，沿途用力七成，贏返嚟輕輕鬆鬆，呢鋪無得拗頸，六環揸一隻守尾門；「佳運發」跨季跟咗好多鋪，上季548出品，玩到今季都仲有漁獲，估計仲未到休漁期。

投注策略三串一，「佳運發」P、「鑽石星空」P、「氣勢」W，一注過關輕輕鬆鬆等睇好戲！

第五場：1佳運發、5安泰、3富國兄弟
第九場：5鑽石星空、8縱橫天下、2競駿飛翔