祖馬龍心水│「競駿輝煌」有「氣勢」

卡爾代咗祖馬龍幾期，唔知大家鍾意卡爾定祖馬龍多啲？不過祖馬龍鐵定回歸，以往睇開《星島》嘅就繼續支持《星島》，不過祖馬龍就喺《頭條》呢度等大家支持。

潮流興人工智能（Artificial intelligence）都唔係第一日，但呢樣嘢就越吹越熱，越吹越普及，越吹越遍布唔同層面。實不相瞞，祖馬龍好早期已經從事FinTech（金融科技）喺銀行任職，排除萬難一早就帶領團隊引入AI，將Research工作、報告推向自動化，提高效率、提升質量，最近亦接受邀請成為講者，喺大學教授同銀行從業員面前講解FinTech。

除咗專業服務外，AI亦滲透到社會唔同層面。早幾日推出嘅新iPhone原來內置AI工具，好快，即使係牛頭角九表嫂只要手持新手機，都可以運用人工智能喺日常生活裏面大搖大擺。馬會近排send咗個短信畀特選VIP祖馬龍，喺間叫Vantage嘅新廂房以AI分析系統比較馬匹勝算。假以時日，真係馬都唔使刨，大家睇祖馬龍吹完一輪大偉論之後，將來真係下邊貼士都可以飛埋喇！

喺依家未飛得祖馬龍貼士之前，不如都花多幾十秒鐘睇埋呢期心水，衷心介紹一下「競駿輝煌」，上季連贏兩場提早唞暑，蹄下敗將「堅又威」及「馬林」都係實力指標，實力就唔使懷疑，唯一缺點係呢隻馬一定會熱，尤其阿蔡「氣勢」呢鋪都實食無黐牙，贏完乜嘢過關飛都打晒落嚟，最後有三倍都執到。不論賠率，呢鋪祖馬龍幾熱都會投注「競駿輝煌」，梳定個靚頭凱旋門見。

第九場：1氣勢、5鑽石星空、9旭日昇
第十場：6競駿輝煌、2合夥奔馳、8昇瀧駒