晨光追擊│「天時明駒」彈力十足

不少參戰馬留待今朝出跳，加上多位騎師到場操馬，有甚多精彩鏡頭出現。現將所見報道如下：

「喜蓮勇略」布文草地跳兩段，雖然大汗但唔心急，展步開揚充滿勁度，神態活躍。「迎樂」戴頭罩由希威森草閘跳兩段，一向詐傻扮懵，晨課表現並唔起眼，平穩走過已算及格。「天時明駒」助手草地跳兩段，急口馬捉實完成，出腳步大彈力十足，毛色好靚，馬身粗壯，外觀引人。

「包裝猛將」拍「堅有利」草閘跳兩段，同樣助手，前駒搶口捉得住，出腳順暢無亂，力度亦唔錯；後駒戴眼罩，大半程拍住走不落下風，展現朝氣，灰馬身壯飽滿結實，外觀引人。「聰明導彈」助手草地跳兩段，輕描淡寫完成，馬身收得輕步頭唔重，老馬保養不俗。

囍眼光力度充沛

「囍眼光」戴頭罩由布文跳一段，沿外檔走有啲急口，馬身已收靚，落腳輕快力充足。「江南勇士」戴頭罩由何澤堯跳三段，看似懶洋洋，實則情緒已轉好，變得聽教聽話。「精選威」戴頭罩由霍宏聲跳兩段，平穩走過神態對辦，身壯毛色潤澤，外觀省鏡。

「囍眼光」馬身已收靚，落腳輕快力充足。

「南區旺」戴眼罩由田泰安跳兩段，唔用頭罩改落眼罩，試來充滿新鮮感特別活躍，上佳水準。「宏才」戴頭罩助手跳一段，慣例搶走慣例急勁，最好的是馬身回復粗壯，唞夠之馬夠醒神。

「駟跑得」希威森跳兩段，神態軒昂充滿朝氣，身壯毛色透光澤，吸引到不得了。「極光彗星」戴頭罩由助手跳兩段，出腳急勁有力，馬身收得好靚展現線條美，狀態起得好理想。

「心想事成」希威森跳兩段，健步如飛有火有力，目光銳利展現氣勢，表現相當省鏡。「快樂奇兵」助手跳兩段，雖然豎尾，不過好專注且展現鬥心，愈走愈勁朝氣旺盛。

兆文