晨光追擊│ 「精算暴雪」再下一城

2024-03-12 00:00

蔡約翰現時仍落後榜首伍鵬志雙位頭馬數字，不過要爭冠仍有機會。踏入季中之後蔡廄密密建功，更厲害是此廄一早作出長遠計劃，有一批馬在田草爭功，有一批在谷草出擊，「精算暴雪」正是後者。

寰宇豐采再斬四両

第二場第三班一二○○米：「寰宇豐采」大前仗首次跑谷戰同程，即在希威森胯下取得一席第二，再出轉由潘頓執韁，卻大敗九個半馬位，這場大敗的原因是早段過於搶口。事實上，「寰宇豐采」口勁一向甚重，而當時潘頓替牠執韁時，早段因為有幾匹快馬鬥搶，這情況下末段變成潰不成軍。

上仗「寰宇豐采」換上布文，賽前罕見親身快跳校好韁口，果然馬兒落場未有搶口走得順暢，更重要布文做足功課，寧願走二疊，而令到貼欄的「鈦易搵」無遮檔繼而搶口，戰鬥力大大減弱。再看「寰宇豐采」上仗段段快開時間靚仔，贏來貨真價實。今次布文停賽，改配騎放頭馬的霍宏聲威力一樣強勁，三班過客可再斬四両。

「寰宇豐采」今次改配騎放頭馬的霍宏聲威力一樣強勁，三班過客可再斬四両。

精算暴雪贏多一場

第六場第三班一二○○米：「精算暴雪」上季尾初出差點得手，今季轉四歲部署按部就班，操足勇態十一月中復出，縱使檔差沿途走外疊一樣輕勝。之後「精算暴雪」升上三班先輸一場，翌仗排靚檔順利補中，贏得看似驚險，實則亞軍「華麗再勝」同樣質素極高，之後連贏兩場。

可能「精算暴雪」前速不俗兼平衡力好，蔡約翰近期安排轉戰谷草，大前仗僅不敵再出再贏的「錶壇精英」，而該役季軍「鈁糖武士」往後連贏兩場。「精算暴雪」前仗排十二檔落敗得第四，上仗改動配加戴防沙眼罩，不止補中更贏夠兩個多身位，一鞭未打齋推輕勝。今再遇同樣加分已多的「錶壇精英」和「鈁糖武士」必有着數，尚要「精算暴雪」搵到最佳配備升勢強勁，篤定再下一城。

按圖睇更多「精算暴雪」相片：