晨光追擊│「競駿天下」狀態勇銳

今朝晨課冷清得好緊要，出跳馬少之又少，幸好除了希廄馬，尚有方廄三駒撐場，亦因此報道一些周四出跳馬畀大家參考。

「競駿天下」田泰安跳一段，戴面箍，試來十分專注又夠生猛，馬身收得壯碩，毛色油潤悅目，外觀夠晒省鏡，早前試閘表現好，狀態長期呈勇。「人和家興」戴頭罩由助手跳一段，馬身收得脹卜卜，毛色又悅目，走勢硬朗有力，保養得好之馬，狀態仍在勇境。「實現夢想」助手跳兩段，戴頭罩及面箍，外觀尚算不俗，然而神色好淡火氣平平，久沉無起色。

「增有」戴頭罩由助手跳一段，扣住走搶住去，神態一貫活躍，細馬身收得壯，未見疲態。「風雷暴」戴頭罩由助手跳兩段，按住順走表現規矩，大馬唔覺重身，神色比前吸引，操足有進步。「青春力量」戴眼罩及頭罩由湯普新跳一段，一貫伸頸及豎尾，跑姿仍生硬，馬身唔夠壯，好感欠奉。

佳景臨門更進一步

「佳景臨門」戴頭罩由助手跳兩段，從容不迫走過，試來比前更放鬆，出腳輕巧彈力夠，勝後狀態比前更進一步。「幸運傳承」戴頭罩由助手跳兩段，腳法唔太靚，不過試得夠專注，力度亦唔錯，饒具好感。

「佳景臨門」出腳輕巧彈力夠，勝後狀態比前更進一步。

「共享富裕」戴頭罩由助手跳兩段，展步順暢利落有勁，細馬收身壯碩結實，火力均比之前有所提升，極速入局。「利衍天下」助手跳兩段，勁度仍未夠，半推半就完成，出腳唔夠爽勁，慢熱進度一般。

周四出跳馬方面。「綠族威」霍宏聲拍「君智盛」潘明輝跳兩段，前駒全程領先輕描淡寫，步大力雄神態軒昂，後駒戴頭罩，動作有點大，力度亦好普通。「禪勝輝煌」戴頭罩由潘頓跳兩段，一貫伸頸同豎尾，然而充滿勁度，毛色悅目烏卒卒，態無不妥。

「常拼常勇」拍「風火恆雲」跳兩段，同樣助手，前駒一直領先，埋尾按住等廄侶追上，快慢由人表現醒神；後駒追勢好且試得規矩，飄口毛病大有改善。「龍之輝」戴頭罩由潘頓跳兩段，越來越斂口，甚至在旁有「觀天下」走過依然唔心急，相當進步。

兆文