晨光追擊│「我做到」胸有成竹

2024-07-13 00:00

明日呂健威擺出超強陣，加上只落後伍鵬志一場，爭冠形勢大好，不過伍鵬志未有示弱，反之周四晨課更來一個破天荒舉動，就是除了「無敵精英」和「韋小寶」，其餘參戰馬全部由騎師主試，動態空前積極。

龍之輝有權爭勝

第二場第二班一二○○米：「龍之輝」過往韁口好重，初出能一擊即中全靠高質搭夠。翌仗此駒已到三班出戰，順利放出表現稱職，可是頭馬「嘉應高昇」實在太強，之後再贏更是以極速勝出級際賽，本身跑出一分八秒四三得第二已好出色。

「龍之輝」一直重口靠高速食胡，幕後想佢有改變，大前仗替牠綁脷，亦因為這個轉變突然慢閘失機未能放出，頂頭大熱只跑第四。幕後知錯能改，前仗替「龍之輝」除去脷帶，同時改由潘頓執韁，這次唔再慢閘順利領放，大勝之餘再締驚人時速。上仗「龍之輝」首度在軟地作賽，結果無懼地淋大雨，更誇張到贏六個半馬位，升二班孭輕磅唔蝕底，何況上仗已講過此駒不斷轉好，今次仍有權爭勝。

「龍之輝」不斷轉好，今次仍有權爭勝。

我做到輕磅更有威力

第十場第三班一六○○米：「我做到」與大部分伍廄馬相反，季初表現一直欠理想，但踏入季尾明顯進步，613場出爭谷草一哩，排二檔守好位下贏得清脆利落。接戰加分加磅後再爭，因為抽了八檔早段一留再留至尾列，直路仍奮力追上只負頭位得第二名。

「我做到」近兩戰再次排外檔，前仗輸遠看似威脅不大，實則當晚跑道極利前置，可交出7-8-9-4走位也是該戰唯一追近的馬，呢席殿軍好本事。「我做到」上仗排檔更差，艾兆禮唔再袖手旁觀，跟得較前之餘，去到七百米更選擇加速，跑法極蝕更遇超快步速，仍跑獲亞軍並拋甩其他馬，勁揪到爆！今仗「我做到」改攻田草，全因覺得出爭三班孭輕磅更有威力，伍廄頭馬一場都不能少，當然胸有成竹。