晨光追擊│ 「自強不息」渾身是勁

雖然明日才是試跑日，但今朝依然有不少參戰馬出跳，而且到草地出試之馬甚多。現將所見報道如下：

「發財鴻星」艾道拿拍「妙算高歌」跳兩段，雖然較遲轉腳且有點論盡，不過好粗身，出腳力度亦唔錯。「自強不息」戴頭罩由田泰安跳兩段，渾身是勁神態生猛，馬身保持壯健毛色靚，佳態洋溢。

「旺旺神駒」潘明輝跳兩段，精神奕奕輕鬆完成，落腳輕盈有勁，銳氣正盛。「晴王」希威森、「友盈友福」楊明綸拍「多多勇駒」跳兩段，「晴王」走中間在末段上前，試來走勢硬淨，馬身收得好靚，「友盈友福」勁勢唔太夠試得牽強，久沉馬未有起色。

「英雄豪傑」戴頭罩由鍾易禮跳兩段，雖有汗濕，但在長韁操控下唔急唔搶，落腳又夠輕快。「德心知遇」戴眼罩由助手跳兩段，毛色比過往好睇得多，出腳步挺利落，饒具朝氣。

鴻圖高星步大有勁

「金鼓齊昇」希威森跳兩段，有點平淡唔太起勁，不過無以往咁大汗乃好事。「鴻圖高星」潘明輝跳兩段，神情專注，步大開揚有勁，長身大馬唔重身，狀態吸引。

「鴻圖高星」潘明輝跳兩段，神情專注，步大開揚有勁，長身大馬唔重身，狀態吸引。

「知道長勝」鍾易禮草地跳兩段，擔高頭神態軒昂，出腳利落且充滿勁度，狀態已去番最佳時。「華麗再勝」希威森草地跳兩段，神閒氣定唔急唔搶，落腳輕快身壯色潤，狀態仍在勇境。

「桃花多」戴頭罩由田泰安草地跳兩段，主動搶走火氣旺盛，身色同樣省鏡，稍稍挑剔是汗濕較多。「昭易揾」黃智弘拍「飛雲」草閘跳兩段，大大隻好有型，出腳力度不斷提升，極速入局。「大紅心」戴眼罩由艾兆禮草地跳兩段，唔再頹好肯走暗火湧現，毛色又靚番好多，狀態大有轉機。

兆文