晨光追擊│「球星」踏上最佳時

2024-06-22 00:00

「球星」上仗在極度劣勢下仍拼獲季軍，輸不夠一個馬位，顯示此駒目前才踏上最佳時候。

今季希斯成績脫胎換骨，亦是回港開倉之後戰績最好的一季，除了一批質新馬，一班中年馬也交出唔錯成績，最重要普遍馬匹都有穩定演出，絕少突然失準，預期下季兵力更充沛，有力挑戰練馬師冠軍寶座。

綠族無限形勢大好

第八場三級賽草地一四○○米：「綠族無限」季內八戰悉數躋身前四名，且上名當達七次，只有上仗落第而已。前仗此駒出爭一級賽主席短途賽乃蝕分甚多的一駒，縱使步速不算快，末段仍奮力追回季軍，若不是直路一度塞車，「綠族無限」應可走得更接近，至少可拼入Q腳。上仗「綠族無限」降級跑三級賽，起步慢了焗住留最後，最弊入到路遲遲唔肯走出最外檔衝刺，也因此遲遲才撻着後勁，最後僅追獲第四。

「綠族無限」連續兩仗跑千二都後上不及，事實上，之前幕後已安排牠向千四及千六米發展，再看贏同程一役締速快達一分廿一秒二七，也是季內此程第三快時間，仲要今戰孭磅唔重，絕對形勢大好。

「綠族無限」今戰孭磅唔重，絕對形勢大好。

球星有力再贏一場

第十一場第三班草地一四○○米：「球星」初期一再易位難贏，但第五仗跑直路賽，有本事由接近包尾追上，表現令人眼前一亮。雖然贏馬之後又一再近而未勝，幸好直到前仗初跑千四，再一次交出驚喜表現。

該仗「球星」既初跑同程，三歲仔孭到一三五頂磅難度甚高，結果不但順利勝出，甚至贏夠三又四分三馬位，而且當日在黏地跑出的一分二廾二秒六四，比起同日三班頭馬「壯志凌雲」還要快七線，而比在二班贏馬「旺旺神駒」亦僅慢三線而已。故此「球星」上仗升班也重注落飛，然而起步受阻未能進佔前列，之後沿途走三疊，在極度劣勢下仍拼獲季軍，輸不夠一個馬位，這席季軍難度極高，也顯示此駒目前才踏上最佳時候。