晨光追擊│「龍之輝」星味十足

2024-06-14 00:00

下季騎練牌照欠缺驚喜，騎師更是原班人馬上陣，因此如無意外潘頓又可再次成為冠軍，但要佢再次破紀錄是一廂情願之事，事關隨着年事已高，潘頓挑選坐騎變得挑剔，無餐士的話未必肯披甲。

佳運發想輸都難

第五場第四班一二○○米草地：「佳運發」昔日表現急躁，急口之餘相仲相當大汗，首季交出一冠兩亞一殿，全因前速銳利，而上季未有斬獲主因是傷過腳，又試過心律不正，當然其評分一直處於高分，也是失色主要原因。今季「佳運發」首戰僅以短頭位見負以為是好開胎，可是之後一再失準，跑至十一月尾更流鼻血要唞一唞，休後反而變了另一匹馬。

唔見一排「佳運發」韁口大有改善，唔再人馬角力，而落場演出更醒，復出跑第四，隨後連續三仗跑第二，前仗更取得久違的勝利。上仗「佳運發」孭頂磅，只以短頭位不敵輕十五磅的「獎金大少」雖敗猶榮，看今次對手更弱，甚至採取主動得也不多，可望輕鬆主宰步速的「佳運發」想輸都難。

「佳運發」今仗可望輕鬆主宰步速，真係想輸都難。

龍之輝再贏一場

第六場第三班一二○○米草地：「龍之輝」首度出賽前，試閘時一再躋身前列，但要留意當時其實韁口好重，根本拉唔住唔識留力，所以首戰能夠照贏，更贏夠兩個身位，確認能力非凡等閒。

接戰「龍之輝」再次證實一切，升班作賽又遇上級際賽頭馬「嘉應高昇」，跑到第二交代有餘，而本身締速更快至一分八秒四三，拍得住二班頭馬時間。「龍之輝」前仗慢閘失機，希威森付出極大代價，上仗立即安排換人，潘頓不負所託，唔再慢閘順利領放，不止又一次大勝，同時又一次締驚人時速，跑出一分八秒六九佳速。更吸引是這場賽事，「龍之輝」再無搶口，三歲馬僅僅數仗已星味十足，保持良好進度，分分鐘是另一匹明星馬。