晨光追擊│ 「海藍寶」叉足電再拼

「浪漫勇士」破盡紀錄，一季贏五場一級賽，成為首匹在香港、澳洲與日本贏馬的馬匹，馬匹厲害，也要遇上伯樂。沈集成目前練馬功力堪稱完美，亦欣賞他的大情大性，再次大啖錫阿淘又成為亮點。

第四場第四班一二○○米：「海藍寶」最大優點就係跑法機動，只要對手稍一不留神被其走甩，要追到牠就困難。事實上，馬兒近期演出不差，大前仗更一放到底開齋。值得留意係贏馬一役，雖然放頭勝出，但步速一點不慢，首八百米造出四十五秒三八，比標準時間快了足足一秒，而總時間一分九秒零二亦出色。

「海藍寶」或許贏馬一役耗力甚巨，因此緊接一仗即走樣，不過回一回氣後，前仗又跑近得第五，而且該仗串Q的「安康萬里」及「鑽石星空」均由尾列追上，反映「海藍寶」能夠放入第五名唔簡單，上仗跑谷草千二則場地偏慢，更弊是有「勁力十足」鬥燒，今次唞一個月上陣充滿誠意，且同場快馬不多形勢有利，不妨追多一次。

第八場第三班一二○○米：「電訊飛車」季內曾大炒對手三個多馬位，之後四戰只一次入位，但另外三戰均跑第四第六，每戰都收獎金。前仗孭到一三五磅排六檔，一出閘就搶想盡快切入，但內側卻有匹「勁力十足」死命力頂，結果沿途被逼走三疊望空，這處境通常係九死一生，然而「電訊飛車」入到直路竟可回氣再掟開對手，僅在最後兩步被趕過，表現出色。

「電訊飛車」上仗配鍾易禮減磅排二檔，利好條件盡集一身，無奈遇上了一匹既進步並發揮一絕的「至合拍」，能夠力拼下僅負且彈甩其他馬匹，這席亞軍同樣犀利。
「電訊飛車」目前才踏上最佳時候，升上三班孭輕磅並不吃虧，分頭又唔錯值得一博。

兆文

立即下載 | 全新《星島頭條》APP : https://bit.ly/3yLrgYZ