紅運帝王萬事靚

蔡約翰現時形勢大好，季內一定全力數胡毫無保留，原因廄內兵力極之充裕，銳開之馬自然打鐵趁熱用到盡，好讓未來騰出更多馬房空缺，以迎接優質新馬加盟。 

第五場第四班一二○○米：「萬事靚」初出成大冷門已有驚喜走勢，出戰同程排十檔沿途在後，入直路閃閃身追獲第五。查該戰是超級強組，前四名「旺旺神駒」、「勇敢夢想」、「你知我拼」及「營造組裝」之後全部再締佳績，前三駒更在三班合共贏四場。

「萬事靚」接戰檔差留得更後，繼續當作熱身，大前仗加面箍用意向好，然而變陣快放卻搶口未能貫注到底。前仗留番住衝用啱跑法，首次上名僅不敵「開心高球」雖敗猶榮，至於上仗強配熱倒，賽後布文表示此馬不擅變化地，純輸場地並非實力。不敢說「萬事靚」質素好高，卻肯定目前評分必有着數，只要場地乾快，補中機會好高。 

第九場第二班一四○○米：「紅運帝王」過往韁口好重，不過有的是質素，縱使陣上一再搶口、人馬角力，依然三番四次跑近。一如大多蔡廄馬，「紅運帝王」多跑下不斷轉好，尤其三月中開始專攻同程表現神勇，先係491場孭頂磅輕勝，翌戰升班又再下一城，十七蚊看似贏得驚險，實則同亞軍「佳運財」雙雙彈甩馬群。至於前仗未能取得三連捷，甚至名次降至第九，實情入直路被廄侶「永遠美麗」封了去路，同時因此失去鬥心。

上仗「紅運帝王」捧走港澳盃，無疑贏在天雨之利，但能夠反先過百分的「永遠美麗」，呢席頭馬含金量極高，今戰不少馬匹為其蹄下敗將，有力在此再建一功。