大家開心蓄銳一戰

文家良今季成績優異，早前更寫下個人紀錄，連勝九日佳績。事實上，練者已鐵定會在下季完結後退休，自然希望餘下的兩季盡力贏馬，留下美好回憶，並向一班支持者交代。

第三場第四班一二〇〇米：「創科先鋒」上季晨課一再見好，也一再吸引到潘頓主戰，可是連番熱倒，最弊的是演出欠穩定，除了一次連續兩仗拼入三甲，並無一次打疊上名。「創科先鋒」的成績失色，可歸咎於心智問題，今季再大一歲變好了，加上操足唔好唔跑，上仗已展現真面目，首度由莫雷拉執韁，沿途守好位，入直路加速交出凌厲衝刺，出頭後更未有分心保持勁勢，最後輕勝一又四分三身位。

「創科先鋒」終於踏上大熟大勇時候，仍在四班難尋敵手，上仗唞夠得手，今仗小休一個月，擺明儲足火力故技重施，當然莫雷拉繼續坐鎮亦是信心保證。

第七場第四班一二〇〇米：「大家開心」上季尾加罩效果不俗，兩度殺入三甲，同樣輸遠看似威脅不大，然而睇番跑一千一役，頭馬「天火同人」彈離贏馬個人表現，千二一仗則克服十二檔難度唔小。

「大家開心」暑期再減三分極之着數，最重要跑番谷草合適，前仗縱使是副車，廄侶「種福者」是出擊主力，但仍能跑得季軍。上仗「大家開心」唞夠操足志在必得，贏馬補中意料之中，甚至跑出一分九秒六三佳速，輕取再出再入位的「齊心同行」，表現光芒四射。今次「大家開心」唞了個多月養精蓄銳，決意再次照辦煮碗，配合埋「創科先鋒」齊齊攻堅，實力戰意兼備。