觀世界三班企得穩

今屆冠軍賽馬日只得五匹日本馬來港，日軍亦有望繼國際賽後，再次成為大贏家。至於出戰主席短途獎的「野田重擊」，勝出香港短途錦標後，返回日本再勝出一級賽，氣勢如虹之餘，今次更有莫雷拉在陣，贏馬呼聲高唱入雲。

第四場第三班一六○○米：「觀世界」馬主一直支持容天鵬，現役的「長長友」，又或昔日的「金鹿」及「觀自在」均有頭馬見面，並全部能在首季建功。而「觀世界」亦唔例外，第二戰已爆出七十五倍冷W，當戰留到極後，轉彎走大外檔，後上勝出唔簡單。近兩仗此駒升上三班成績一般，然而上仗早段脫節落後甚多，去到最後三百仍在包尾，最後依然收回甚多失地，爆出最快末段廿二秒五八，表現遠比紙上賽績好。

「觀世界」三班一定企得穩，針對翻步慢前速欠銳利，扳上千六正確決定，而且更有廄侶「美麗日子」在陣，肯定有足夠步速後上爭勝。

第十場第二班一二○○米：今場焦點當然是「速遞奇兵」，但首次跑二班賽會唔會蝕章？而過往三戰最短一次要唞三個禮拜，今仗只隔兩周出戰，既有以上隱憂，不如向「錶之未來」打主意。

「錶之未來」來港後極速適應水土，首戰爭泥一擊即中，之後轉戰草地更勁，唔計前季跑香港經典盃千八氣量不及，其餘賽事全殺入前四，七戰累積兩冠一亞兩季一殿。上仗此駒被捧到三倍，幕後千計萬計，卻計不到「韋小寶」會放。不過，要留意「錶之未來」由前仗千八，一下子大幅縮程跑千二，這一席亞軍是極高難度。今仗再遇雙重加磅的「韋小寶」，形勢上極有利，更加強配搭用到潘頓，有望一雪前恥。