正本開心見好必拼

希斯近期復現強者本色，對上四戰均有馬贏，其中「佳運財」更成為首匹三捷希廄馬。事實上，希斯功力毋庸置疑，之前成績不似預期，或多或少因來投馬匹非自家出品，此際親自引入的馬開始上力，自然成績起飛，餘下日子希廄馬可睇高一線。

第四場第四班一八○○米草地：「正本開心」大前季一出即勝後無以為繼，皆因當時心智仍未成熟，該暑期做了閹割手術，上季演出可靠得多，密密出戰絕少大敗，整季取得兩冠、兩亞、兩季，當中有三仗上名是出戰三班。

今季「正本開心」初跑三班又排外檔，幕後留以有待，在重返四班決心出擊，可惜強配依然無功而返。為此羅富全變招，前仗安排「正本開心」扳上千八，效果一絕力拼入Q，僅不敵「巴基之友」，上仗再增程扳上二千雖跑梗頸，但負頂磅檔差留極後，形勢不利追上跑第四一樣出色，並確認目前跑長途最好。今仗「正本開心」再戰長途見好必拼，且形勢比上仗好，羅廄近期殺得性起，正路馬膽。

第五場第四班一六五○米泥地：「雷霆戰駒」頭五戰無次有飛，亦次次輸遠，奇怪前仗初跑泥地千八突然熱捧，該仗即刻有料到，由大前仗輸八個身位，縮減至個多身位，並首次走入三甲。

以為限於長途千八最好，上仗「雷霆戰駒」縮程一哩繼續有好表現，若非檔差刻意慢閘切入，繼而最後六百米要發力加速，照計已勝出，並非以馬頭位飲恨。確認「雷霆戰駒」跑泥地最強，同時證明一哩無問題，今仗有望繼續前列而歸，當然蘇廄馬好開例好，「韋小寶」、「騰龍超影」、「箭意」等等都是例證，也是追捧的信心指標。