「超霸神駒」如日方中

今晚上演季內第二次全泥夜賽，季內首次安排在十一月四日，當晚舉行八場賽事，除了「錶之未來」以十六倍建功，其餘七匹頭馬都是七倍以下熱門，反映全泥夜賽再不像以往般是爆冷溫牀，而事實上今季泥地賽的熱門勝出率亦不俗。今晚兩匹心水既是熱門且同樣來自沈廄，馬房已連續八期贏馬，今晚繼續重兵城下有望延續勝纜。

第八場第三班一二〇〇米：「好玩福星」首捷贏草地弱組，接戰改攻泥地，在起步受阻下留後照贏，前仗升班轉彎走三疊，不久後更外閃愈走愈外，更弊的是好遲才撻着，在劣勢下輸得極之唔抵。上仗「好玩福星」排埋二檔照計好穩陣，但始終前速唔快，最不利的是當日大利前置馬，縱使衝刺凌厲也追不上「獎金大王」。賽後再翻睇影片，發現「好玩福星」入直路未有轉腳，賽後並驗出氣管有血，可見這席亞軍勁揪到爆。拼罷小休幾日已見「好玩福星」復課，三月二十三日考閘扣到實主動追馬，證明傷瘉狀態又弗，配合沈廄強勁攻勢而來，放心追捧。

第九場第二班一六五〇米：「超霸神駒」大前仗跳上一哩突然神勇，段段快開大勝四個多馬位，跑出一分三十七秒八八，只比當日「烽煙四喜」慢零點零三秒。接戰「超霸神駒」雖然未能添食，然而初跑千八，負磅急增了十五磅，跑到第三已算是有交代，再講頭四百米放到一分廿二秒三七，簡直是自殺式狂放。至於上仗「超霸神駒」配上潘頓發揮就好得多，跑番一哩亦更啱，跑出一分三十六秒八七三班紀錄時間輕勝，更誇張是入閘好扭計周身大汗，最後能贏到真係唔簡單。「超霸神駒」當打如日方中，與「烽煙四喜」、「黃金甲」對壘絕不輸蝕，何況孭磅輕得多，力足再贏一場。