紅鬃烈馬萬事俱備

筆者除了睇晨操，亦會留意場地偏差等因素，但有時卻因而弄巧反拙。好似剛戰夜賽直路大利中外疊，預期下半場「日日靚」、「綠色有運」會蝕，實情不然，但奇怪偏差極大你知我知，臨場仍有不少騎師選擇在內檔衝刺。

第五場第四班一二○○米：「紅鬃烈馬」上季試閘好搶眼，出跳亦課課勁，其實睇開晨課的朋友都知係糖衣陷阱，因為此馬得個狂字得股蠻勁，這類馬多數唔得多過得。相隔了一個暑期，今季的「紅鬃烈馬」變得收斂淡定，唔再狂、唔再癲，陣上接受鞍上人操控，果然場場有好表現，三戰全部躋身三甲，首戰跑一分八秒八八時間，上仗再佳締一分九秒一一佳速，更吸引拋甩馬群，只不敵明日之星「勝得威風」，再睇季軍「新威煌」再出補中，確認呢席亞軍水準好高。

今戰「紅鬃烈馬」面對的對手弱得多，繼續孭輕磅又好跑，波健士難得有好馬在手必拼，萬事俱備放心捧場。

第七場第三班一八○○米：「樂益善」初出跑谷草一哩即跑得接近，誇張到是留到極後，最後爆出全場最快末段追第四，而頭兩馬「喜盈寶」及「歡欣福星」之後再出串Q，賽事水準真係高到不得了。

「樂益善」外地雖贏大長途，但始終來港只係短短日子，千八都未跑過之下，上仗一下子跳上二千二難度唔少，結果再次有技驚四座演出，改變跑法守好位，贏馬之餘並擊退多匹路程專家，按韁大勝四個馬位。加十分後，仍在三班上陣極之着數，同時因為要爭分入選打吡，今場亦係最後機會，當然全力以赴，甚至贏得愈遠愈好。