「秒秒精彩」喜逢弱旅

希斯歸來後成績遠遠不如預期，其實現時香港賽馬水平甚高，而到港的E布馬大多不是希斯購入，所以上半季成績失色實可理解。經過半季，希斯唔再客氣了，不少未達水準馬匹已轉馬房，加上自己購入的生力軍已到港，預期戰績將會大幅度冒升，是下半季的捧場最佳對象。

第四場第四班一二〇〇米：「秒秒精彩」初出搶口有頭無尾，高伯新就好機警，翌戰立即替此駒加戴交叉鼻箍，結果放得無咁急有回氣位，最終差點放到僅輸個馬鼻。奇怪係放得好，之後一戰又留番住跑，上仗終於肯放了，但卻變路程，千四好開卻改爭千六，令人費解！

「秒秒精彩」一早證明了有實力，仲要是只跑四仗的質新馬，告東尼接手確值得期待。事實上，此駒加盟東廄短短時間，馬身已養到脹卜卜好粗壯，更吸引口勁收斂不少，變得好放鬆。再看「秒秒精彩」的前速不俗，跑谷草當然勝任，尤其四班千二次次拆組，今次就兩組拆成三組，告仔一早認定會面對弱手，贏面大大提高。

第六場第三班二二〇〇米：「傑彩繽紛」要多跑至好，經過十月及十一月密密出戰，近月狀態冒升，未跑上仗之前，一連四仗跑第五，大前仗若非受困已殺入三甲。田草二千是「傑彩繽紛」唯一贏馬路程，上仗相隔一年有多終於再次出戰，可惜運氣唔好排最外檔，唯有選擇留後，莫雷拉已盡全力了，在最後彎中段已踩油，點知入到直路前無去路，再一次塞車有心無力。

隨着年紀愈大，「傑彩繽紛」氣量愈見充沛，扳上二千二應無問題，更鍾意的是牠最近試多課閘，使出蔡廄一貫出擊撒手鐧，充滿出擊決心。