阿碌開咪｜中招知識須普及化

上月中招之後，小弟多咗個身分——中招輔導員。不停有各行各業老友靜雞雞查詢。

呢班老友，並非街邊阿叔、維園阿伯，而是在本業有頭有面英明神武者。

原來佢哋在自己專業好巴閉，但並非乜都識，又唔好意思問人，以免被覺得好無知咁。其中有一樣更唔知點問，正是——中咗招點搞？好在有我呢個「中招先鋒」朋友，於是個個來訊問：「喂喂，碌Sir，不幸中咗招，會唔會……」N咁多問題，綜合之後，不外乎以下幾條：

一、中招其實有乜感覺，會唔會好辛苦嘅呢？

二、中咗招，是否一定要申報？唔申報會有乜後果？

三、假若申報，點申報？如實申報後，會否畀人捉去「糟糕灣」隔離㗎？會否強逼要入營㗎？好驚！因為唔知同邊個同房，容乜易困獸鬥？仲有，我最怕用公廁，又日日食慣飲慣乜乜物物，可否帶埋入去㗎？

四、假如我中咗，會否全部家人都唔准出街，要陪我一齊坐疫監呢？若如此，點搵日常支援？

五、若我如實申報，跟住會有乜程序要面對？由邊個確認？由邊個畀手帶？由邊個畀藥？有乜野藥？

六、收到隔離令後，幾時先放監？假若七日後仍兩條綫點搞？要「藕」幾多日才掂呢？

七、若七日後連續兩天測試為陰性，是否可以自己剪手帶？邊個知我是否真係經已「冇毒」？

八、聽講衞生中心條熱綫「一世都打唔通」，若如此，有疑問時，可以問邊個、向邊個求助？

以上就是綜合所有提問者的疑慮。全部小弟經歷過晒，故可以一五一十咁詳細解答。

不過，做咗大半個月輔導員後，我自己問自己：「喂，咁鬼多英明神武者一嚿雲。咁等而下之的普通草根市民咪仲大劑？究竟點解會咁？」答案好簡單——主體官員解說不足！

其實小弟呢個「中招輔導員」角色，根本應該由政府拍一條宣傳片取代，在各大電視台及網上日播夜播，將中招知識普及化，咁咪唔使條熱綫忙到燒綫都未得掂囉！

曾智華

 

阿碌開咪

編按原題為「中招輔導員」