阿碌開咪｜免費好介紹

古語有云：同行如敵國。同行相輕，自古皆然。

係真唔係真？就小弟N年觀察，六成真，此乃人性使然。大部分人的質素就是自私自利，大家做同行，有個「錯覺」，是零和遊戲，在比併鬥爭，你輸就是我贏，又或我贏就是你輸。所以，幾大唱衰對手。

呢種心態非常狹窄，難成大器。

因為你知我知，乜叫成行成市？若只得一家食肆孤伶伶，點好，都要人專誠走去幫襯，好難啫。

但若果集齊幾十甚至上百家搞個「飲食城」，咁當人人想起食時，就一定到此一遊。首先，選擇多。其次，一家冇位，也可去另一家也。

兼且咁多同業，大家聚埋，一定唔衰得，必會出現良性/惡性競爭，總之就是拼出高質。

講咗咁多，其實今日我想講講一個見證，就是香港飲食業中，有一大群業內人士，不但冇同行如敵國，兼且互相扶持，互相勉勵，令全行水準提升。

點解會咁？當然一定要有充滿魅力的「領頭羊」！正是稻香集團主席鍾偉平。

老鍾「廚房佬」出身，純靠個人打拼，一步一腳印，慢慢成為上市公司主席，故此，深知飲食業要蓬勃發展，能繼續養活二十多萬員工及無數家庭，必須永遠向前，永不停步。之外，也要團結及增值。於是，多番游說後，得到政府支持及職訓局合作，開辦一個提升飲食從業員知識、質素及管理能力的「稻苗學會」。二○○三年至今，已訓練出數百專業飲食業管理人，令這行生生不息。

小弟多年見證，稻苗學會的畢業生，大部分無私又團結，有難題時我幫你、你幫我，同時也瞓身推廣飲食業。今個月二十五日至二十九日，佢哋又齊心在中環PMQ搞一個「香港飲食業25年發展多面體展覽會」，招待市民免費入場。三大展區包括：香港飲食業歷史、各個地方菜式精髓文化傳承，以及非常重要又有前瞻性的餐飲業科技發展及應用。

香港人砌下去，靠邊個？當然靠自己！一於支持稻苗學會！

曾智華

 

阿碌開咪