阿碌開咪｜鼻毛可鼻

上周小弟中正「六合彩」（COVID），公開後，N咁多人來訊。發覺真係似唱歌仔——你中佢中個個中……即係不少老友就算自己唔中，身邊總有家人、同事或朋友中過/中緊。

爆第五波之後，雖由一日萬幾個「中」落到一千左右，但最近又彈返上三千。加埋加埋，你話幾鬼多人中呢。兼且你知我知，好多人中咗，根本幾大都唔報。

事實，權威機構也指出，隨時有兩百幾萬甚至更多人中過。但患者反應好唔同，有啲頗嚴重，又發燒又喉嚨刺痛兼咳到飛起，有啲則根本中咗都唔知。我則屬「中間分界」，中的第一個凌晨喉嚨有多少癢及痛，也有標冷汗。之後幾日變穩定，只有些微唔舒服，比一般感冒更易忍受。

不過，為家人，當然要：一、上報。二、自我隔離，鎖在房中，直至兩次檢測陰性。

小弟公布中咗後，N咁多人問：「喂，碌Sir，知唔知邊度黐條『綫』返嚟㗎？」

日日幾千人中，通街通巷病毒，鬼知咩？初初病毒出現時，每日只得十個八個，當然容易排查啦。如今爆到七彩，周圍係，故此，外國多採取躺平政策——唔理兼唔公布，一於共存！

香港當然要有自己一套——湯同水混合（唔湯又唔水）！

講講喺邊度惹回來先。上周一齊中的老友「大B」WhatsApp話：「如今染疫，根本屬早晚的事，所以大家應該中午出外（搞爛GAG），或可以避過一劫。我非常釋然，因早肯定『鼻毛可鼻』，故煮到埋嚟就食，食完就有大段時間放心呢度去、嗰度去，心態就如此簡單！」好嘞，究竟小弟點「中」的呢？冇確定答案，只知上周一食咗餐飯，八人中四個中。當中一個，早兩晚與某名人共聚，事後發覺名人翌朝中咗。

你話我阿Q也可，「中」咗一於當享受幾日Staycation，靜靜寫下野、睇下戲。事實，過去幾日驕陽似火熱到黐肺，你叫我出街都唔制。

曾智華

阿碌開咪