阿碌開咪｜梅老點解唔怕煩

上周五睇《星島日報》，揭呀揭，揭到國際版，睇見標題，不期然衝口而出：「嘩，九十歲都仲得？唔係啩？」

乜事？正是當日大字標題——《91歲梅鐸四度離婚，與超模結束6年情》。

仲得，不但講性能力，更重要，仲可以唔怕煩，重新再搞一次離婚的法律及財產分配程序。

以前讀過一本生理學書，當中指出，凡做大領袖的男性，無論在哪個領域，必有極強征服欲，同時性慾也超強。所以，有很多戀情及婚姻關係。係真唔係真？大家可由歷史人物到自己身邊人物印證，就知有幾堅了。

最近大家都讀到湯告魯斯有幾多段情啦，佢正是典型的「電影界領袖」，充滿征服欲。

講返梅鐸，千幾億身家，兼且貴為全球傳媒大亨，達官貴人個個怕咗佢，自然N咁多人巴結，包括不少懷着各式動機的女人。

老友，其他街邊阿公八十幾歲，搵鬼吼咩！但梅老不同，異性慕名或者好奇黐埋去肯定不少。所以，就可以有一個一個又一個！

N年前第一次與空姐結婚，玩唔長。最長第二段婚姻，妻子是女記者，玩足三十多年才散檔。兩段婚姻後，仍未煩夠！第三段是眾所周知的「巴辣妹」鄧文迪。短短五年，又散，時為二○一六年，當時佢已八十開外，一般正常男性，多已眼矇耳聾身縮背曲，乜器官都唔掂啦吓嘛？

哈哈，你咪理，佢竟又立即再戀愛，今次更勁，竟搞上滾石樂隊靈魂米積加（Mick Jagger）拍拖二十二年的女友、前超模霍爾（Jenny Hall）。此女有名為社交蝴蝶，又撻得着，犀利。結果，兩人二○一六年在倫敦一所教堂正式結為夫婦。

今次，玩咗六年再散Band。

小弟結一次婚，已深覺由戀愛到籌備婚禮再到生兒育女，然後全家互相適應，乃一非常大「工程」。真係玩一次，人都殘，乜都夠。

呢丁梅老，玩足四次，分分鐘可能再有第五次，究竟是否有點「變態」呢？

曾智華

阿碌開咪