阿碌開咪｜虛擬嘢畀虛擬人試

投資領域之內，乜嘢古怪構思都有。冇乜壞，因資本主義社會，強調自由，思想自由，言論自由，金融自由，創作也自由。

這個自由是表面，底下當然是一個森林：正人君子有，古惑仔女有，理想主義者有，大奸大惡者有，「森林生態」，正是如此。

所以，「金融產品」有千萬種要拉客投資，而互聯網上，亦有N咁多廣告「令人終身財務自由」，兼且個個都話自己非常成功，少年股神、青年樓神。

係真唔係真？當然唔係。但騙子通常肯蝕頭注，也包裝醒目，故才引得貪心者及發夢以為通過投資好易發達者上釣。

近年我與呢群「掠水族」反其道而行，頻頻出席為退休者或準備退休者而設的分享會，提及有幾項大原則，希望與會者能吸納，以保財富平安。

否則，辛辛苦苦儲埋的幾百萬元「棺材本」，隨時誤信某些「投資項目」，幾日就可蝕光。

我的心法，其實應該人人皆知，包括：

一、大部分時間不投資好過投資。因不投資不會蝕本，最多蝕少少港元貶值。但錯誤投資，則是災難。

二、香港股票幾千隻，大部分屬「垃圾」，無謂花時間研究，反正記錄顯示，九成是蝕本貨。要研究的，只需集中恒指成份股中的本土公用股及歷史悠久大集團股。切勿沾手甚麼內地新經濟及新科技股，全部是先作個故事造勢，推高股價，令散戶如癡如醉，接貨後，再仙女散花。請看看所有這些股的股價，全部兩年來跌去一半！

三、新嘢留返畀新仔（年輕人，心口有個勇字）去試，佢哋在變成熟投資者前，必定要交學費。幸而年輕，大把日子在前頭，勝在仆低也可有時間再爬起。但退休者，切勿試！例如以為「虛銀」及虛擬貨幣大有前途，結果八家虛擬銀行去年共蝕逾三十五億元。虛擬貨幣也創造賊竇，想知過程，到Netflix睇《Trust No One》啦！

總結，世界冇符碌，但灰色地帶甚大，足夠騙子橫行。

曾智華

阿碌開咪