阿碌開咪｜贏硬賽事認真跑

特首選舉史上首次「一匹馬大賽」，明天開閘。跑真馬，一匹跑也未必「贏硬」，因有機會噴鼻血停步，又或踩氹斷腳（全部發生過！）。但「超哥大賽」，邊有得唔贏？

雖然一隻馬跑，但超哥完全當「真」咁操，有齊顧問團、主席團、競選辦，公關策略也有專人負責。

所以，大家由佢開始宣布參選到第二、三日，已見明顯變化，尤其笑容，因超哥先前形象絕對嚴肅，唧都唔笑，做大Sir咁款，當然可以嚇窒三山五嶽古惑仔，但選特首乃政客行為，一定要討好全港市民，所以，一亮相就要笑！唔識？關埋門由專人教！

此外，心態上一定要是「面對全港市民」，千祈咪穿崩變「搞掂班選委就掂」。故此，掛在口邊，一定要大團結，為全港市民服務，尤其關顧弱勢社群，探訪劏房戶乃指定動作。其實智囊應該教佢跟埋明哥去深水埗探露宿者及派飯，咁就更是理想，畫面一在電視及報章出現，立即加分！

幸而公關高手都有提點佢做肥彭最拿手一招，巡草根地點，包括街市。肥彭乃資深政客，慣技係見到乜街坊飲品食物都「隊」入口，包括涼茶及蛋撻。呢方面，超哥略遜，只表示喜歡食牛雜。其實佢應該向着鏡頭「隊」幾粒雞蛋仔、缽仔糕及灌杯雞骨草就更理想。

搞選舉、搞親民，就是要做平民日日做的事，以示We are same same。

所以，林鄭選舉工程認真失敗，竟連八達通都唔識用，連買廁紙都唔識買。

我哋冇得選特首，但日日見超哥左撲右撲，「真嘅一樣」咁去操，OK啦吓嘛，又唔係佢想一個人跑嘅，無謂怪佢嘞。

今次超哥最特別為個個商會都親身拜訪，連漁民團體聯會都去，獨冇去地產建設商會，大家唔使問點解，心照！

今日沙田跑十場，周三冚旗之潘頓，將配合告東尼齊齊開飯！騎三隻告廄馬「樂滿貫」、「合夥雄心」、「加州威勝」，必有皇者興！又或連珠爆發！

曾智華

 

阿碌開咪