阿碌開咪｜四哥、曾江、韋史密夫

周一早上，手機爆炸，皆講一件事——韋史密夫在奧斯卡直播中怒摑基斯洛克。這一幕，完全冇人預期會發生，現場及電視機旁的觀眾嚇到呆咗。片段之後瘋傳全球，個個一睇必問：「吓，發生乜事？」

咁驚嚇，咁Juicy，立時將去年收視率低到喊的《奧斯卡頒獎禮》，重新變成全球話題，將所有眼球吸盡。

最戲劇性，摑人者與被摑者皆笑笑口，冇再發生肢體衝突。稍後，郁手打人的韋史密夫更榮膺影帝，激動地領獎，以慰被基斯洛克公開嘲諷的太太珍達。

上述片段瘋傳完後，大家冷靜下來，開始互問：「咦喂，究竟呢幕係堅定係設計的呢？有乜後果呢？」

有此一問，因不少好奇者用慢鏡重播再重播，發覺摑人的韋史密夫與被摑的基斯洛克，皆露出貌似偷笑表情。再睇，發覺韋史密夫上台時笑笑口。當然，大家可以另一個角度解讀，就是韋史密夫欲「攻其無備」，而基斯洛克偷笑則是為自己解窘，尋找落台階。

不少人問：「碌Sir點睇？」

答曰：「不論真假，皆非Wise Move！」事實，做任何娛樂「騷」，本質應該吸引外，舉世幕後都會諗：點樣令佢爆？有乜Talking Point？故此，娛樂新聞不少是「憑空創作」出來的，俗稱「煲水」，但也有高手或低手之分。今勻，看台評論，明顯唔Buy韋史勿夫之「衝動」也！

昔日電視台不少老師傅，皆極擅長「煲水」。其中之一為「Gag王」黎文卓。佢有句名言：「凡娛樂新聞，就視之為當鋪『信義盛』（信二成）好了，千祈咪認真。」

大家可記得幾年前TVB《4個小生去旅行》嗎？在記者招待會上，謝賢「怒斥」曾江，並兜巴摑過去，胡楓及Joe Junior立時阻隔勸交。

這一幕，又變全城話題，令節目收視爆升。

究竟係真唔係真？我親自問過胡楓，佢只微微嘴笑，大家內心領會好了，記住——「信義盛」呀！

曾智華

阿碌開咪