阿碌開咪｜新特首「呼之欲出」

周一本報A1頭條獨家消息——《中聯辦約晤建制「元老」，徵詢特首人選意見》。

報道一出，手機群組立即爆炸，互問：「點睇？」

有此一問，正因提名期已殺埋身，而家先做「徵詢」？即係乜？即係未有確定「祝福人選」，又或者仍十五十六。為求穩陣，再「一對一」（即唔該坦白！）找愛國愛港陣營重點人馬摸底。

小弟與眾多分析界、官界及政界老友交換睇法過程，有位K哥與我相同，對某某人選有點「發現」。正是有位「永遠熱心選特首」人士，突然公開話——新特首人選已「呼之欲出」。

喂，乜叫呼之欲出？

講的這位人士邊個？咪係Regina囉。唔好問我邊個係Regina呀，若咁都唔知，你無謂睇落去嘞，因閣下乃「政治一嚿雲」！

Regina的講法非常有趣，大概指出，中央如今的布局，對香港，非常重視三點：一、國家安全；二、香港治安；三、反恐部署。因此早由內地調派三大部門頭頭坐鎮香港，絕不容以上三方面出亂子。

故由此思路進發，下任特首人選，除必定是對國家忠誠（百分百信得過）、愛國愛港外，更重要是對上面三項重點工作都有深入認識。此外，下任特首當然應該對政府運作瞭如指掌，有豐富行政經驗。

具有以上幾大範疇條件的香港人，根本不多。若中央以「穩定壓倒一切」作大局思考，下任特首人選已應「呼之欲出」了。

各位，睇到呢處，你可推斷到Regina所講的人是誰呢？估中無獎，哈哈哈！正是佢自己！事實佢的確具備所有條件兼無人不佩服的burningdesiretobecomeChiefExecutive！

好多人懷疑，喂，佢幾次想入閘都唔夠支持噃！嘻嘻，今時唔同往日，選舉制度「完善」咗喇，加上國安、反恐及《23條》變首要任務。只要阿爺認定佢屬最佳人選，哪個選委會不舉手支持？

曾智華

阿碌開咪