阿碌開咪｜林大輝「一石三鳥」

因多年處身傳媒前綫，小弟有機會近距離接觸及觀察所有政圈人物，坦坦白白，覺得起碼有一半純屬自私自利或根本唔夠班的普通料政客。

真正有份公家心、具視野、闊胸襟又行事得體的，唔係冇，只是大概十隻手指數晒！當中理工大學校董會主席林大輝為佼佼者，近兩年香港遇到前所未有波折，每次老林在所有公開場合發言，都非常得體，絕不會「火上加油」。

各位，絕對唔簡單㗎。因社會撕裂至此，你講乜都可能畀人又上「色」又扣帽子。做個公眾人物，唔畀各路人馬踩踩踩已難。若想人哋覺得你公正有建設性，咁你武功必須超群！

我的觀察，林大輝公開發言，絕少似其他低手政客，擺明純為個人政治前途鋪路，又或只想霸更多權力。因佢態度從容，眼神及語調都冇蠱蠱惑惑味道（政治人物中好難搵㗎）。

最近佢「忽發奇想」，拋出一個「超級大學城方案」。不少人一聽，立時拍案叫好，因為一石三鳥，兼能為特區政府解決一個老大煩惱。

係乜呢？眾所周知，香港有幾隻長期流血不止亦無望康復的「大白象」，其中佼佼者，正是海洋公園。將納稅人的錢日日萬萬聲咁倒入鹹水海，納稅人喊到啞晒。

點搞？我早早大聲疾呼要當機立斷止蝕。然後……做乜好呢？再起一隻「大白象」？當然冇咁蠢！若化作豪宅城，又肯定畀人柴到飛起。但如此珍貴地皮資源，肯定為庫房製造百億元財富儲備，豈可變為公屋？

林大輝果然有創意，提出將海洋公園拆掉，改建為超級大學城。將浸會大學、城市大學及理大搬入，盡用九十公頃土地培育人才。

天價投資邊度搵？易！將三所大學現址改規劃成商業及住宅用途。大家可知，呢三塊地皮值幾錢？天文數字到可能連計算機都打爆！

解決一隻失血大白象，換來超級大學城，另加三塊天價地皮撥入政府土地庫。呢招一石三鳥，怎可不火速落實？

曾智華

阿碌開咪