阿碌開咪｜做高官必須懂分寸

早前樓下李純恩指出，任何成熟人士，由出社會工作到與朋友及親人相處，都應以兩個字作基本態度——分寸。　

大家絕對早早應該明白及心照，唔需要再解釋，又或由別人教。

　　分寸，在各個領域，皆有非常客觀清晰的準則，尤其專業人士，冇可能扮唔知！

　　簡單舉例，若負責監察騎師行為及陣上表現的競賽小組董事，公餘時間竟約騎師到酒吧買醉，攬頭攬頸四出享樂，是否「成何體統」冇晒分寸呢？

　　同理，做法官的，一定時刻要約束自己的社交聯繫及曝光，以維持公正嚴謹形象。

　　做紀律部隊阿頭的，也要令全世界覺得你堅守公平執法，故此，也應與公眾保持適當距離，絕不可畀人懷疑你會徇私。

　　必須強調，尤其廉政公署頭頭，更要謹守個人廉潔形象。食得鹹魚抵得渴，做得呢個位，就要有心理準備「斷六親」，低調及冷冰一點。

　　當然，不但上述擁有公權人馬，其他政府部門的管理層也要極小心。例如負責城市規劃、土地政策及建築條例的官員，切戒與地產商或建築商有「親密私人關係」，就算普通的社交行為（例如地產商贏馬，你一齊拉頭馬），也要避免！

　　今日講咁多，乃因過去半年，高官之中，出現太多「冇規冇矩冇紀律」（不等於犯法）現象，例如光顧非法按摩院、私下收禮……搞到退休高官老友「嚴謹J」極之睇唔過眼，覺得若不煞止，成個政府將陷禮崩樂壞。

　　「阿碌，我退咗休，身分問題，不方便高調出聲。但作為政府前決策層，見到近月現象，個心好唔舒服！睇《星島日報》及你個專欄的，有好多上中下級公務員，麻煩你傳遞我心聲啦，其實都係為香港、為做公職者好啫。做得官，擁公權，豈可抱『唔犯法就可做』心態行事？市民點可能接受你毫無分寸，道德門檻低成咁？今天好難要求大家懷有『公僕』咁高尚情操。但人有人格，公務員，唔該有返個格畀市民尊重下好嗎？」

曾智華

阿碌開咪