阿碌開咪｜唔麻醉，電你隻牙！

人的一生，當然要見N加N次各類醫生。

眾多專科醫生之中，你最怕見邊科呢？小弟不少朋友一致回答——牙醫！

因為，一瞓上牙醫椅，就似坐電椅，等待「行刑」。由最輕的洗牙或補牙，到最重的剝牙（各種，包括要搏鬥似的拔掉智慧齒！），又或磨牙……總之，冇一樣不似行刑。

最弊，牙醫用的工具，也非常得人驚，又磨又撬又拔又鑽……仲有，發出的「吱吱」聲，也極嚇人。所以，十之九九病人一坐上牙醫椅，神經系統立時繃緊，雙手互捏，希望時間快點過。

我的睇牙生涯中，最大大大鑊一次為補牙。唔知點解，醫生竟問我：「曾先生，需唔需要打麻醉針呢？」

當時，小弟完全冇補牙經驗，覺得，既然佢問到，當然不一定要打啦。於是，「大丈夫」上身：「唔打都得！」答完大安旨意，嘩！原來後果絕對沒齒難忘，因實在令人極度震驚！

醫生開動電鑽，將牙窿鑽闊。攞大命，十級痛楚，忍到標尿。因又赤又痹又痛！老友，咁鑽落牙肉內的神經綫，怎不痛到黐孖筋？

呢次教訓，深入腦海。以後，牙醫唔問，我都主動提出：「請打麻醉針。」

前日，又因牙痛，被逼去「行刑」。瞓在椅上，照例要求醫生：「唔該打麻醉針！」

點知，醫生略一皺眉，非常有禮貌及耐性回應：「曾先生，今次唔得。因為，我要試試你隻牙有冇『死』到！『生』的牙，內藏活着的神經線，可以測出反應。『死』的，則冇反應。 所以，唔可以落麻藥後再試。嗱，我會先電你隻牙，痛就舉手！然後，我又會磨下隻牙，同樣，赤痛就舉手！」

跟住，大刑侍候！佢唔知用乜工具，真係一電即痛。嘩！急急舉手，以免佢嚟多嘢。然後，又用磨牙工具猛「吱吱」聲磨。哎吔吔，痹晒赤赤痛，又再急急舉手。

「恭喜你呀曾先生，經過兩次測試，證明你隻牙仍生存，冇死到。所以，可用其他方法保住佢，希望再用多幾年啦！」


曾智華

阿碌開咪