阿碌開咪｜「馬氏力場」被廢

早年香港打工一族講起「李氏力場」，就個個會心微笑，大家打個眼色，唔使解釋，心照——點解會咁勁㗎……真係吖！不過，一切定律都可能會被打破的。近兩年「李氏力場」時得時唔得，可能超人退咗休啩……當然是講笑！

不過，代之而起的，是「馬氏力場」。即係乜？即係，非常神奇，過去足足五年，凡跑馬的日子，上天總會眷顧，令其順利舉行。

小弟與其他資深馬迷親眼見到及親身體驗N次，非常神奇。例如周日跑馬，周六仍狂風暴雨，甚至掛風球。但一到周日早上，立即轉天氣，就算不是風和日麗，也基本變微風細雨，令十場馬可以全部順利跑完。然後……哈，試過幾次，一跑完啫，第二個風又來，周一再掛風球！

也試過周三跑快活谷，早上至下午行雷閃電倒水咁款，基於冇風球又非黑雨，馬會當然不會取消賽事。

傍晚，奇怪事就發生。暴雨竟會自動在六點左右收工，畀一小時跑道去水。然後，十一點跑完八場，上天恍似再開水掣，於是又來黃雨、紅雨至黑雨，成個天想冧咁款。

以上經驗，並非一次兩次，而是N次！

就正如早年「李氏力場」的「形成」，並非撞彩一兩三次，而是次次，才會出現「假定律」！

當然，「馬氏力場」也是「假定律」。剛剛就在前日打破，「馬氏」功力全失。

當天早上掛八號，本來天文台清晨宣稱中午可能改掛。咦……小弟與一眾馬友歡喜死，諗住「馬氏力場」再次顯靈，點到你唔服？

結果，唉，邊有人信係純「科學預測」吖？天文台突然上午十點又再「彈弓手」，話最快下午四點才會改掛較低風球。

你話冇政治考慮就扑我個頭！因若早一兩個鐘，全部下午工作就得恢復，全港打工仔個個仆返工，交通大混亂，唔鬧爆就奇。可能就咁，於是「把心一橫」啩？

此稿時，乃周三下午一點，邊有乜狂風呀？天要下雨娘要嫁，廢「馬氏力場」，也如是觀。

曾智華

 

阿碌開咪