阿碌開咪｜大力做騷 效果不高

九七之後，中央為顯尊重特區政府「高度自治」，駐港的領導代表非常低調，幾乎隱形，絕不曝光，更不出巡。

　　不過，如今……時移世易了，好明顯要全世界知——其實邊個話緊事先，所以，國慶前中聯辦主任高調落區，深入社區，慰問籠屋住戶，坦言心情十分沉重，表示香港住屋問題，一直牽動中央的心，暗暗指示特區政府「必須加大力度解決住房問題」。

　　駱惠寧更重申——中聯辦重視聽取基層市民的呼聲。這句說話含話中話，有乜效果呢？

　　駱主任一巡，立即引起香港本土政客強烈反應。

　　首先，政府各高層立即紛紛嘭嘭聲爭相湧去探劏房。包括財政司司長陳茂波、財經事務及庫務局局長許正宇、運輸及房屋局局長陳帆、民政事務局局長徐英偉，個個Call齊記者做探訪騷，大包小包猛送住戶博見報。

　　最好笑，「大家姐」葉劉淑儀永遠走位靈活，窒「後輩官員」唔使本，即抽水：「駱主任走入群眾體察民情，特區政府呢？一眾官員，你們究竟醒覺了沒有？」

　　葉劉有權講，因佢除了身為行政、立法會成員外，早年亦試過親身走去瞓籠屋，雖則騷味極濃，但以佢如此身嬌肉貴也肯紆尊降貴，的確又將一眾官員比了下去。

　　不過，今次葉劉自製地雷，因太急發帖，唔知國慶日大量局長早已飛身走晒去探劏房、籠屋，於是「中伏」，畀徐英偉代「老闆娘」反擊：「特區官員一定要貼近民情，亦已一連兩日走入群眾。下次希望同葉太一齊走入社區啦……」

　　嘩，徐局長都幾好膽，大家姐都敢反窒，日後必有好戲佢睇！

　　一眾政客爭相做騷回應駱主任，最有趣為田二少，化身「送米大叔」，Call齊記者表演托米探劏房，非常高調。

　　公關專家一睇，即指：「大力做騷，效果不高！」

　　「碌Sir，政治騷，宜Subtle及有品味，才覺有誠意。打鑼打鼓送幾袋米，市民反應只覺得啖笑！」

曾智華

阿碌開咪