【阿碌開咪】恒生大學德政

文憑試下周放榜，各大學當然競逐最優秀成績的尖子，一切以公開考試成績為收生準則。這個制度，香港行多年，好唔好呢？公唔公平呢？是否真正令到有最高質素的學生可以入讀大學呢？以上幾大問題，爭辯N年，答案並不一致，但卻冇人諗到一個更佳機制去代替。

我就是這個機制下的犧牲者，因自己屬「考試盲」，也怕死讀死記，所以，在香港教育制度下，注定大墮後。

加上小弟求學年代，中三開始強逼選文科或理科，剛剛我又正是「廁所關刀」，文又唔得，理又唔得。咁點搞？難道就此瓜得？

好彩，仍有一條路——去外國！一於走去美國再過。呢呢，咁就掂晒。因當地教育制度強調發揮所有學生天分，令人人爆發。只要你有一強項，必有學科可以容納。

那時我才知自己雖然乜都唔得，但有一強項，彈離所有平排同學，乃——講得。

發覺自己的天分及興趣後，立即主攻一項。既不用只強調筆試，更不需死咪死讀，只需靠真人口講，另再自製電台電視節目，立即可以科科A，成為榮譽學生畢業。

今天想指出，香港若繼續用只論考試、不論其他，來作大學收生準則，一定年年會荒廢大量人才。

最近，終於見到曙光了。正因香港恒生大學早前公布新學年推出收生新猷，在「校長推薦計畫」下，設立「直接取錄機制」計畫。每名中學校長，可推薦一名學生，不問文憑試成績下，按學生在學術或非學術領域的卓越表現，預選直接取錄。

這樣，起碼可以開多一扇大學的「窗」，給予「考試弱，天資強」的學生。

恒生大學勝在自資，故收生彈性較大。我看，這個計畫肯定成功，而收到的學生，表現必不會比正常取錄的學生差。

點解？簡單，你是中學校長，若沒有百分百信心，會作出全校獨一無二的推薦嗎？

「恒大」何順文校長，我支持你！

曾智華

 

阿碌開咪