【阿碌开咪】「蠢新闻」从天降

从事电台广播及专栏写作几十年，不时有生张熟李问：「碌Sir，你日日讲日日写，边有咁多题材㗎？有冇试过乾塘呢？」

小弟必笑笑口回应：「从来未试过噃。简单，日日打开报章、上网及听下睇下新闻，就有N咁多野可以畀我嘲笑、分析、抨击……尤其公众人物乱噏野及某啲愚蠢政策，好好『玩』㗎！」所以，我每朝必买齐全港几份大报，在茶记边叹多奶奶茶（滑好多），边睇有乜笑料。

呢呢，最新鲜例子，前日就有单新闻在「报纸屁股」出现，真系笑死人冇命赔。

呢单，可称之为「蠢新闻」，简直从天而降畀我锄，过足瘾！

乜野咁蠢？正是环保署就「塑胶饮料容器生产者责任计画」展开公众谘询，建议市民回收一个胶樽，可获一毫子回赠。

初初睇到呢段报道，小弟以为自己眼花，于是除下眼镜捽啊捽，肯定清楚再睇。唔……坚喎，真系「一粒神」（一毫子广东话俗称）喎。

咁就笑到喷奶茶啦。究竟环保署班高官知唔知今时今日一毫子有乜用呢？（答案：「冇！」 ）咁今时今日又有冇人想要一毫子呢？（答案又系：「冇！」唔该去街头街尾街市档口睇睇，全部唔收毫子！）呢个谘询，真系离地到爆，唔知由边个「天才」度出，幻想有任何市民会为一毫子山长水远攞个胶樽（就算十个……一百个都唔会啦！）去回收，喂，讲出嚟都畀人笑冇脑啦。

小弟百厌星上身，立即在自己的网上「粉丝页」公布：「我决定在此实牙实齿公开承诺，边个（最好环保署啦！）肯上门到舍下收玻璃/胶樽，我愿出一百倍价钱，每星期十蚊鸡！」

其实到过/住过加拿大、澳洲、台湾、日本……的香港人必知，垃圾分类，必须由教育及执法双轨并行，才能建立一套文化，令人人遵守，长远成功。

特区政府的废物处理政策，窒下窒下，又怕痒，又怕痛，搞出个一毫子回收，唉……笑鬼死人冇命赔！

曾智华

阿碌开咪