星島日報

【阿碌開咪】亂噏下屆特首人選

2021-01-21 07:44
有一個「性感話題」,永遠都會吸引眼球者,正是——下屆特首人選。嗱嗱嗱,各路英雄,今日標題已講明「亂噏」,大家切勿認真對待呀!

話咁快已二○二一年,部署選下任特首,時間已經無多。任何起動,最遲五月要郁,因有太多「未知數」要求「選」前搞妥。

昨日無聊,於是召集幾位前高官、前議員、前報界老總、大數據總裁及資深政治評論員,開個私人《城市論壇》,搵家無乜人幫襯的大酒樓,兩人一枱,開三枱,隔兩米照傾,各爆秘料,非常精采,可惜超過七成唔公開得,冇癮至極。

其中討論到下任特首,人人一開波就笑:「哈哈哈,葉劉最快搶閘,次次冇得跑,但次次最早熱身舉手大叫——我想跑!真服晒佢!」事實Regina有齊基本條件㗎。

先講第一任特首。一九九一年時,香港冇乜人識邊個係董建華,但英國派來的前港督肥彭,竟然委任佢入行政局。政治江湖當然起哄,頻問:「此君乜野料子?」

小弟走訪「知情高人」,答:「安排佢入行政局,在最高管治架構操馬呀!佢乃首任特首!」

當年聽,半信半疑,事後發覺高人犀利。

於是再問高人:「通常中央會點選特首人選的呢?事前又會有乜安排?」

「做特首,一定要識『管』香港。若連公共行政及管治理論都唔識,對政府架構又矇查查的話,極易開閘墮馬,倒瀉籮蟹!所以,必先有以下一種培訓:一、坐過最高權力核心的行政局/行政會議;二、做過極高層官員,熟悉政府運作;三、有高段數能力;四、最重要,中央信任!」

查查現今政圈邊個最具條件,結果葉劉之外,論形象、能力、意願,有三個最似樣:一、陳茂波(公務員肯支持,性格隨和易溝通);二、查史美倫(名門望族,鐵娘子,公職王);三、任志剛(有天大決心要「吐氣揚眉」也)!其他行政會議成員?《城市論壇》認為冇個夠班!

曾智華

阿碌開咪

最新回應

關鍵字