【金融High Tea】北水踏藍浪而來 美國派錢一日食胡

港股一月當旺，喺北水湧港下，恒指大升779點，大幅升穿29000點，收報29642點，而且成交飆升至3000億元，大有挑戰三萬點之勢。北水今番趁美國政黨輪替踏藍浪而來，頗有點大時代味道。

港股由上星期制裁股報復式反彈，揭開北水湧港序幕，美資被特朗普胡亂發功制裁，被迫大手沽貨，但北水就你走我來，來港資金佔大市總成交近一成。喺資金流入下，恒指昨日趁美股休市初段已經高開，港交所（388）話咁快就衝破500元心理大關，高見525元，雖然美資摩通降其評級至「中性」，但仍收報501元，大升4%。

港交所喺2007年港股大時代時，曾衝破200元，當時有外資大行火上加油話睇500元，結果好多股民跟住衝落火坑。時光飛逝，14年後銀紙不值錢，但股票漲價，港股交投由當時的1000億，飆升到現時3000億元，年初至今港股日均成交達2297億元。港交所股價真係見到「大牛價」，茶友笑言點都要食番少少胡，賀一賀大時代來臨。

港交所無為而升

喺大升市中，港交所不是升得最強勁的藍籌，但其受到熱捧有其標誌性，因為在北水眼中，這隻股係香港金融市場獨一無二的公司，上海、深圳都找不到，要買港股「手信」，這是最正宗選擇。所以老早有猛人話，只要港交所不手多多去搞甚麼發股收購外國交易所，喺港交所自己股票供應有限下，這隻股在旺市就有得炒。現時港交所前總裁李小加離任，接任人未有，正好無為而治，反而係炒作時機。

北水選擇今個星期湧港，順便挑美國制裁股發難，你沽我買，大有提早慶賀藍浪味道，皆因特朗普下台，民主黨全掌白宮、參眾兩院，形成藍色浪潮，勢將反轉上任施政政策。之前令港股跑輸內地股市的美國制裁惡浪有望紓緩，用內地術語講，香港出現「價值窪地」，可以南下加注炒吓。


從港交所當炒，可見市底夠強，茶友沽一部份貨食胡，並非看淡後市，只是低買至今賺得多，套點利是錢過年，可稍解不食胡手癢癢的感覺。

現時大市雖然逼近三萬點，但平股依然周街走，不少大藍籌仍然係單位數市盈率，息率有4、5厘。不過現在係北水入市，內地資金炒股興集中火頭炒幾隻股，而唔係乜股都炒推高指數，好似去年底到今個月頭，內地熱錢狂炒大股金龍魚A股，一口氣無停過，股價由40元人仔，炒到今個月8號見145元先回調，現價125.5元，動態市盈率仍然有100倍！

內地股民稱金龍魚為「油茅」，即係油中茅台。但飲白酒嘅有錢人，可以飲幾萬元一支50年茅台，但金龍魚賣食油，莫非真係可以咁定價法？但如果用這個邏輯在內地炒股，就可能變成「認真你就輸了」，所以即使內地資金走來炒港股，現在本地有好多平股，但如果係短炒就要注意資金流向，佢地都會炒得較集中，並不一定炒落後。

小米收復制裁失地

藍浪下港股氣勢如虹，盤中最多飆985點，高見29848點，創2019年5月3日以來高位，距離三萬大關一步之遙，收報29642點，急升779點，四日累升1406點；科指跟隨走勢，收升2.8%，報9374點。港股成交額3015億元，創有記錄以來最多。

「尾班制裁股」小米（1810）高見32.5元，收市仍升5%，報31.4元，昨日高位已回補上周五急跌裂口；有股民留言話周一聽了陸羽仁的建議，早上在29.4元入小米，昨日在32.4元先沽一半，持股一日未交收已食胡10%，其餘一半再放吓飛機，美國派錢真係快靚正。

喺資金主導大市下，港股通年初至今交投甚為熾熱。繼港股通周一（18日）力吸資近230億元，周二明顯再破紀錄，港股通投資者全日淨買入港股266億元，當日買入成交為628億元，賣出成交則362億元，創下單日紀錄。保險股友邦（1299）大升4%，收報108.9元，力撐大市，獨力推高恒指134點。

陸羽仁

原文刊於《頭條日報》