星岛日报

【阿碌开咪】使鬼你预测咩

2021-01-20 07:56
今时今日做高官,真系预咗做「沙包」,去到边都畀小市民作出气袋,鬼叫你薪高粮准又大权在握咩!如今香港经济差,失业率高,疫情严重,政治气压低沉……根本完全冇野可令香港人开怀,谷埋谷埋,当然向低民望政府「开波」,真系乜都可以闹一餐,无法,倒转位置也肯定如是。

前日早上,我正打开《星岛日报》叹奶茶,再睇睇自己专栏篇《呢班友是否黐咗綫?》,真系日头唔好讲人,文内的四位的士大佬及肥师奶又刚刚杀到,分三枱坐,再开《城市论坛》。

佢哋也属本报读者,打开新闻版,睇一版,闹一单,真好火。最劲闹……唉,当然又系高官,今匀轮到财爷陈茂波中招。

  A:「喂,肥强,你一日踩足十二小时,赚几钱呀吓?」

  B:「高佬文,今时今日咁环境,赚到三四百蚊算偷笑啦,尤其夜间班大哥,更惨无人道!」

  A:「即系赚万零蚊一个月啦。咁考下你,估计失业率会否继续升呢?」

  C:「高佬文,乜你问埋啲咁白痴问题㗎?你行出街睇睇,愈来愈多执笠铺,就知失业率肯定继续升啦,问都多馀!」

  A:「呢呢,咪系罗。猪头炳,你知唔知财政司司长一个月几钱人工?」

  D:「最少三十几万啦,兼有官邸、工人、司机、管家、厨师……神仙生活呀。」

  A:「收几十万月薪,位高权重,竟作出『阿妈系女人』的失业率将继续飙升预测,真系顶头槌,肥师奶,你都识预测啦。」

  肥:「我昨晚睇新闻,听到都谷鬼气㗎。小市民想知你点拆掂经济下行及失业率高升,你就好似乜『桥』都冇,就走出嚟曝光献世,唉……」

哗!我听到一额汗,睇嚟「波叔」肯定畀人闹到《财政预算案》出笼嘞。不过,又系嘅,失业率升,使鬼你预测咩?等我预测今晚快活谷跑出边只仲好啦。小弟提供三只:「战熊三千」状态处顶峰,不停拍跳;「专一」为咗向老婆大人表忠而落注;「明月辉煌」韦达揽住亲操,有手影!一于每只买佢十蚊鸡WP!

曾智华

阿碌开咪

最新回应

關鍵字