【阿碌開咪】呢班友是否黐咗綫？

上周四早上七點，又夾大疊報章到土瓜灣茶記歎早餐，照舊見到兩枱共四位的士司機，開工前旁若無人大大聲來個《城市論壇》。　

通常佢哋噏乜唔會影響我，因噪音聽慣，會變「好似冇聲」咁㗎（老婆大人的????哦也如是）！這個有點似孔子名言：「與惡人居，如入鮑魚之肆，久而不聞其臭，亦與之化矣！」事實班友早上純粹發泄，乜都鬧餐飽，通常為鬧而鬧，根本冇Point。

不過，當朝突然有一句，立即令我耳仔似被攝住，正是：「呢兩個公務員工會班友，究竟係咪黐咗綫？知否家下香港乜世界？」可能小弟做咗三十幾年公務員，所以對呢個身分及呢三個字特別敏感，於是豎起耳仔，聽佢幾位有乜咁勞嘈。

哦……明晒！

原來當朝有報章內頁大字標題——《兩工會促額外寬免公務員薪俸稅》，內容為政府紀律部隊人員總工會及香港公務員總工會，齊齊去信財政司司長陳茂波，要求在下月發表的《財政預算案》中，額外寬免公務員薪俸稅，以「振軍心，助經濟」。

班的士大哥咁馨斗，當然愈鬧愈大聲，難得旁邊的早餐客也和應，覺得兩個工會超級自私，離晒大譜。

有位肥師奶最夠霸氣：「真係黐晒綫！呢兩年香港環境咁惡劣，做生意又好，打工仔又好，苦不堪言，又炒魷又減薪。你班公務員，尤其高層的，薪高糧準，生活毫不受影響外，更因樣樣減價，令消費能力大增，喂，咁環境，仲好意思要求減薪俸稅，知唔知個醜字點寫？」

嘩，個個咁馨，我都係戴返頂帽加口罩好啲嘞，容乜易比肥師奶喝問：「碌Sir，你同唔同意呀？聽講你都係退休公務員噃。」如此場合，當然幾大唔挺身表態，反之嗱嗱聲灌埋杯奶茶，找數後晨運去也。

小市民講野最直接，心聲隨口而出。希望兩個「貪得無厭」工會主事人，知道香港草根百姓點諗，否則下次政府民望調查，將會更「乞人憎」！

曾智華

阿碌開咪