Edan巧遇阿佘 恨合作：叫君如開套戲！

呂爵安（Edan）昨日出席美妝品牌開幕儀式，吸引過百「爵屎」（粉絲暱稱）到場支持。日前Edan成功集郵「三料視后」佘詩曼，他昨日解釋當日是同吳君如拜年，巧遇阿佘更一齊打麻將，笑言細個看阿佘的劇，感覺神奇，讚阿佘沒氣場而且超玩得，得知對方都有看《全民造星》，多謝她支持！

Edan透露最近正忙於練舞，稍後將為MIRROR新歌拍MV，而3月他亦將推出個人單曲。受訪時Edan表示不知道昨日是元宵節，可能晚上會跟家人吃飯，對於MIRROR將推出英文歌，Edan指今次找來外籍排舞師，舞蹈上會比以往不同和跳得更出力，所以體力上會要求較高，雖然早前中了COVID，但幸好很快復原，所以沒有問題，又特別點名大讚柳應廷（Jer）排舞出席率最高，是練得最多的人，所以大家都叫他大師兄。至於Solo歌方面，Edan透露是一首慘情歌，更指已籌備好耐，自己也希望儲多些歌曲，等開演唱會時就不需要唱太多別人
的歌。
提到早前Edan表示《盜月者》票房4,000萬時會露「八月十五」找數，昨日現場都有爵屎叫他「還債」，問Edan現時票房已達2,000萬，是否會先露一半？他笑說：「我幾時有講過『八月十五』係咩？好搞笑嘅係我前幾日無聊睇返啲《I SWIM》舊相同片，咁啱日期又係8月15日，啲人笑話係咪咁樣當找數？啲人話驚我走數，我係有承擔嘅人，4,000萬再算啦！（練定股肌？）點練？睇吓點啦！」至於有甚麼方法再催谷票房？Edan指除了謝票外，最有效的方法就是靠口碑，令未睇的人也會入戲院觀看。
爆阿佘都有睇《造星》
此外，Edan最近與「三料視后」佘詩曼合照，他指當日是跟吳君如拜年，更和阿Jer、肥仔一起跟阿佘打牌，「好開心，最後好似係阿Jer同肥仔贏，但阿佘超玩得，細個睇佢啲電視劇，冇諗過可以同佢同場打牌，呢件事好神奇！（冇俾佢啲氣場震懾？）完全冇氣場，超Nice！」Edan指打牌時也有向阿佘傾偈取經，不過又取笑阿Jer食不到糊發脾氣扁嘴。問到阿佘是否識唱他們的歌曲？他指阿佘也說有看《全民造星》：「呢件事都好得意，佢好supportive，好多謝佢。（傾吓合作？）唔夠膽講，呢啲唔係我話事，如果有機會當然好，因為佢係好有經驗、好犀利嘅演員，大家又咁啱識咗，通常同前輩合作會驚、因為有氣場，但佢完全冇，希望有機會，叫君如開套戲啦！」