楊千嬅：下半場學習慢活

踏入龍年，正式「入五」的楊千嬅直言，人生下半場要懂得慢活，有意向身心靈進修方面發展。
楊千嬅在月初（2月3日）正式「入五」，今年她選擇在香港過新年，除了在正日生日當天與「群英會」歌迷齊齊慶生外，更於農曆大年初五在澳門舉行一連兩場演唱會。踏入50歲，千嬅直言是人生的下半場，同時亦是一個新階段，除了繼續巡迴演唱會外，她亦覺悟要懂得慢活，並自爆有意向身心靈進修方面發展。
千嬅近年忙於為《楊千嬅MY TREE OF LIVE 世界巡迴演唱會》走埠，今年農曆新年，適逢千嬅有一個小假期，加上囝囝亦會回港度歲，可以與家人共聚天倫。新年過後，千嬅繼續馬不停蹄為巡迴演唱會綵排，對於正式踏入50歲，她坦言是一個人生新階段，同時亦是一個重新編排自己人生方向的一個階段：「踏入咗人生下半場嘅時候，其實都會重新排位，我覺得最重要都係身體健康同屋企人，尤其是囝囝、爸爸媽媽和朋友。」
花更多時間陪囝囝
她續指在演藝工作上營營役役多年，是時候需要放慢腳步：「我哋去追求夢想節奏太快，會遺留咗好多路上漂亮嘅風光，我覺得現在開始應該活得仔細，學識慢活，去欣賞身邊嘅美景，當下自己想做嘅嘢就去做，再冇乜特別嘅目標。」對於未來工作計劃，千嬅坦言已經沒有以前般進取，她表示：「我真係想做自己鍾意做嘅舞台，甚至乎有啲唔關演藝工作事，有興趣去study發展身心靈嘅野，最緊要陪多啲個仔，因為佢現在大個，可以好似朋友咁同我傾偈，咁我要好好珍惜呢啲時間。」
對於人生下半場，千嬅有另外一番感受：「過去4年我有時間去沉澱自己嘅生活，發現好似重新認識咗自己，對自己及生活好奇心大咗，了解自己多咗，開始就會聽多啲自己心裏面想做嘅嘢，同時又會想同屋企人去更多唔同地方旅行，呢個都係創作靈感嘅一種。」最後千嬅預告，除演唱會之外，亦會陸續出新歌，在音樂上表達自己的新想法。