獻計鄭中基搞日夜繽紛場賺錢 古仔展歌喉 紅館秒變K場

鄭中基前晚（19日）於紅館舉行《Fragments of Wonder 鄭中基世界巡迴演唱會2024》香港站尾場，嘉賓古天樂（古仔）化身開籠雀兼獻唱《男朋友》，全場大合唱令紅館變成K場；古仔更幫手收利是滿場飛跟觀眾握手、合照，令全場瘋狂，更教路鄭中基開「日夜繽紛演唱會」賺錢！
鄭中基重提拍攝《家有囍事2009》時認識古仔，大爆古仔在片場很寡言，要不停說話引他笑才成功成為朋友，又自爆首次監製演唱會壓力大到失眠，向做老闆多年的古仔取經，古仔笑言：「好簡單，你係咪唔跳舞？唔跳舞就開埋日場，咁就變《日夜繽紛2024鄭中基演唱會》，你開完日場再開夜場，連綵排都賣埋飛。」古仔反客為主請來捧場的梁詠琪、193、肥仔、胡子彤、陳明熹及林家𤋮（Locker）上台畀意見。
自爆中新冠影響練氣
完騷後，鄭中基透露早已邀請古仔，沒料到古仔上台會講那麼多，已預了超時罰錢，不會要古仔找數。問到新年開騷要付「三工」有否錢賺？鄭中基說：「未計數，希望唔好蝕。（古仔話開日夜繽紛騷？）如果冇中COVID，相信做到，我要再練氣，真係唔知原來咁大鑊，以前我跑5K，中咗之後跑1K已好似跑5K，而家跑3K幾就要行。」
為安全叫停騷後見面
談到突然取消完騷後見粉絲及簽名，鄭中基解釋因當日見有粉絲的頭被夾在欄內，「後邊係咁推，我哋已經叫唔好推但唔得，為佢哋安全着想所以要停。」至於早前巡唱加拿大站因入境問題延期，他指仍然等待中。